Martin Braithwaite ukinira Barcelona yashyizwe ku rutonde rw’abaherwe ku Isi
Rutahizamu w’ikipe ya FC Barcelona ndetse n’ikipe y’igihugu ya Danemark Martin Christensen Braithwaite niwe mukinnyi wenyine wa Barcelona wagaragaye ku rutonde rw’abakinnyi batunze amafaranga menshi muri uyu mwaka nkuko urubuga rwa Forbes rwabigaragaje.
Ubusanzwe buri mwaka urubuga rwa Forbes Magazine rushyira hanze urutonde rw’abakinnyi bakina imikino itandukanye batunze agatubutse kurusha abandi, ni muri urwo rwego ku rutonde rw’uyu mwaka hagaragayemo rutahizamu Martin Braithwaite ukinira ikipe ya Barcelona ndetse akaba ari nawe mukinnyi wenyine w’iyi kipe washyizwe kuri uru rutonde kuko uwagashyizweho ariwe Lionel Messi atakibarwa nk’umukinnyi wa Barcelona kuko yamaze gusoza amasezerano.
Nkuko Forbes Magazine yabigaragaje, umutungo wa rutahizamu Martin Braithwaite urabarirwa agaciro kangana na miliyoni 250$ (212 million EURO), Ubutunzi bw’uyu mukinnyi bwagiye bwiyongera kuva mu myaka ine ishize binyuze muri Company yashinze yitwa NYCE ikora ibijyanye no gukodesha amazu ahenze muri Amerika, yashoye kandi amafaranga mu bucuruzi bw’imyenda afatanyije n’umugore we ndetse akaba afite naza Restourant mu gihugu cya Espagne n’Ubufaransa.
Igitangaje cyane nuko uyu rutahizamu Martin Christensen Braithwaite ataza mu bakinnyi 10 ba mbere bahembwa amafaranga menshi mu ikipe ya Barcelona kuko agaragara ku mwanya wa 14, ariko urubuga rwa Forbes rwo rukaba rwerekanye ko ariwe mukinnyi wenyine wa Barcelona uri ku rutonde rw’abakinnyi batunze agatubutse muri uyu mwaka.
Martin Braithwaite n’ikipe y’igihugu ya Danemark bakubutse mu mikino y’irushanwa rya Euro, aho baviriyemo mu mikino ya ½ batsinzwe n’ikipe y’igihugu y’Ubwongereza ibitego 2-1 ariko habanje kwitabazwa iminota 30 y’inyongera (Extra-Time), Muri uyu mwaka w’imikino kandi Braithwaite yakiniye Barcelona imikino 42 atsinda ibitego 7 ndetse anatanga imipira 4 yavuyemo ibitego.
Yanditswe na Bertrannd Iradukunda
