Manchester City yegukanye igikombe cya gatandatu cya shampiyona y’Abongereza
Ikipe ya Manchester City yegukanye igikombe cya gatandatu cya shampiyona y’Abongereza mu mateka yayo, nyuma yo kunyagira Brigthon & Holve Albion mu mukino w’umunsi wa nyuma wa shampiyona.
Ni nyuma y’imikino 37 ya iyi kipe y’umutoza Pep Guardiola yari imaze gukina itarisobanura na Liverpool bari bahanganiye igikombe. Byabaye ngombwa ko hiyambazwa umukino wa nyuma ngo hamenyekane utwara igikombe.
Manchester City yari yasuye Brighton ku kibuga cyayo, mu gihe Liverpool yari yakiriye Wolverhampton Wanderers ku kibuga Anfield Road. Iyi Liverpool yarangije umukino itsinze ibitego 2-0 bitigeze bigira icyo biyifasha.
Byasabye City imbaraga nyinshi kugira ngo igarurire ikizere abafana bayo, dore ko Brigthon yabanje kurunguruka mu izamu ryayo. Iyi Brighton yafunguye amazamu ku munota wa 27 w’umukino ibifashijwemo na Glenn Murray gusa Sergio Aguero ahita yishyura iki mgitego ku munota wa 28 w’umukino.
Manchester City yatsinze igitego cya kabiri ku munota wa 38 ibifashijwemo na myugariro Aymelic Laporte. Ni ku mupira yateye n’umutwe ari wenyine imbere y’izamu, nyuma ya koruneri yari itewe na Riyad Mahrez.
Mu gice cya kabiri cy’umukino abasore b’umutoza Pep Guardiola bakomeje kwiharira umupira, banabona ibindi bitego bibiri.
Umunya-Algeria Rihad Mahrez yatsindiye Manchester City igitego cya gatatu ku munota wa 63, mbere y’uko Ikary Gundogan atsinda icya kane kuri Coup-Franc yo ku munota wa 72.
Ibi bitego bine byari bihagije ngo Manchester City itware Premier league ya gatandatu mu mateka yayo. Ni igikombe cya kabiri kikurikiranya iyi kipe ya Guardiola itwaye yikurikiranya, dore ko yaherukaga no gutwara icy’umwaka w’imikino ushize.
Iki gikombe kandi ni icya kane Vincent Kompany usanzwe ari Kapiteni wa City atwaye kuva yayigeramo muri 2008.
Muri rusange Manchester City yasoje shampiyona iri ku mwanya wa mbere n’amanota 98, inota rimwe imbere ya Liverpool. Ikipe ya Chelsea yasoje ku mwanya wa gatatu nyuma yo kunganya na Leicester City 0-0.
Ikipe ya Tottenham yarangije shampiyona ari iya kane n’amanota 71, Arsenal isoza ari iya gatanu n’amanota 70 mu gihe Manchester United yarangije ku mwanya wa gatandatu n’amanota 66.
Amakipe atatu agomba kumanuka mu kiciro cya kabiri ni Cardiff City yasoje shampiyona ku mwanya wa 18, Fulham ya 19 na Huddersfield Town ya 20.
Abatsinze ibitego byinshi babaye abasore batatu bakomoka hano muri Afurika bose batsinze ibitego 22. Aba ni Mohamed Salah na Sadio Mane ba Liverpool cyo kimwe na Pierre-Emerick- Aubameyang wa Arsenal.
Abandi batsinze ibitego byinshi barimo Sergio Kunu Aguero wa Man City watsinze 21, Jamie Vardy wa Leicester City watsinze 18 cyo kimwe na Raheem Sterling watsinze 17 anganya na Harry Kane.
