Mambo yiyongereye ku bakinnyi 2 Bugesera yahagaritse nyuma yo kwandagazwa na Rayon Sports
Rucogoza Aimable uzwi ku kazina ka Mambo yiyongereye kuri Ndatimana Robert na Niyonkuru Djuma Radjou bamaze guhagarikwa n’ubuyobozi bw’ikipe ya Bugesera, nyuma y’uko iyi kipe inyagiwe na Rayon Sports ibitego 5-0 mu mukino w’umunsi wa 18 wa shampiyona y’u Rwanda.
Nk’uko bigaragara mu ibaruwa yanditswe na Perezida wa Bugesera Gahigi Jean Claude ayandikira Rucogoza Aimable Mambo wanasinyiye ko ayakiriye, uyu mukinnyi wanyuze mu makipe atandukanye ya hano mu Rwanda na we yahagaritswe imikino ine adakinira iyi kipe ya Bugesera Fc.
Intandaro y’ihagarikwa ry’aba bakinnyi ni imyitwarire idahwitse imaze iminsi ibaranga, inakomeje kuba intandaro yo kutitwara neza kw’iyi kipe ya Bugesera kuri ubu yicaye ku mwanya wa 08 ku rutonde rwa shampiyona y’icyiciro cya mbere.
Aba bakinnyi bose uko ari batatu bamaze guhagarikwa banakiniye Rayon Sports, byanavuzwe ko baba baragize uruhare mu gutsindwa n’iyi kipe y’ubururu n’umweru iheruka kubanyagira ibitego 5-0, ndetse bamwe bakanabashinja kuba ngo barariye ruswa kuri uyu mukino.
