Louise Mushikiwabo ni we watorewe kuyobora Umuryango w’Ibihugu bivuga Igifaransa
Minisitiri w’Ububanyi n’Amahanga, Louise Mushikiwabo, ni we watorewe kuyobora Umuryango w’Ibihugu bivuga Igifaransa, nyuma yaho abakuru b’ibihugu byitabiriye iyi nama bamwemeje mu bwiganze busesuye.
Abakuru b’ibihugu na za Guverinoma bagera kuri 40 nibo bemeje Louise Mushikiwabo nk’Umunyamabanga Mukuru w’Umuryango w’Ibihugu bikoresha Igifaransa mu myaka ine iri imbere.
Amatora yabaye mu muhezo mu gitondo cyo kuri uyu wa Gatanu tariki ya 12 Ukwakira 2018, nyuma y’ijambo rya Perezida Kagame rimushyigikira nk’umukandida w’u Rwanda na Afurika muri rusange.
Mushikiwabo atorewe kuyobora uyu mwanya ahigitse Michaëlle Jean wari umaze imyaka ine ku buyobozi.
Abaye uwa kane uyoboye OIF nyuma y’Umunyamisiri Boutros Boutros-Ghali (1997-2002), Abdou Diouf wo muri Sénégal (2003-2014) na Michaëlle Jean (2014).
Mushikiwabo w’imyaka 57, amaze imyaka icyenda muri Minisiteri y’Ububanyi n’Amahanga y’u Rwanda.
Mushikiwabo yari amaze amezi agera kuri atatu azenguruka mu bihugu byinshi, ku migabane itandukanye, agenda agirana ibiganiro n’abakuru b’ibihugu bigize OIF, bakamwereka ko bamushyigikiye.
Umuryango wa OIF washinzwe mu 1970, uhuza ibihugu bivuga Igifaransa, aho igenzura riheruka mu 2014 ryerekanye ko igifaransa kivugwa na miliyoni 274 mu migabane itanu y’Isi.
