Liverpool ihabwa amahirwe yo kwegukana Premier League, yatangiye ikosora West Ham United
Ikipe ya Liverpool iri mu makipe ahabwa amahirwe yo kwegukana igikombe cya shampiyona y’Abongereza y’uyu mwaka, itangiye shampiyona inyagira West Ham United ibitego 4-0.
Ni umukino wabereye kuri Anfield Road ikipe ya Liverpool isanzwe ikiniraho.
Ikipe ya Liverpool nk’uko byari byitezwe yatangiye yataka cyane, ari na ko igenda iremarema uburyo bw’ibitego imbere y’izamu rya West Ham.
Iyi kipe yari yabanjemo abataka bayo bose yafunguye amazamu ku munota wa 19 w’umukino, ku kigtego cyatsinzwe na Mohammed Salah. Ni ku mupira wari uzamukanwe na Naby Keita bitafashe iminota myinshi ngo yigaragaze nk’umukinnyi ukomeye.
Iyi kipe y’umutoza Jurgen Klopp ntiyarekeye, kuko yakomeje kotsa West Ham igitutu, ari na ko igenda iyihushahusha n’ibindi bitego. Ku munota wa 45 w’umukino Liverpool yabonye igitego cya kabiri cyatsinzwe na Sadio Mane. Ni ku mupira yari akatiwe na Kapiteni James Milna.
Igice cya mbere cy’umukino cyarangiye Liverpool iyoboye n’ibitego 2-0.
Sadio Mane wari wahaye West Ham akazi gakomeye yagarutse ayitsinda igitego cya gatatu ku munota wa 53, mbere y’uko Daniel Sturidge atsinda igitego cya kane ku munota wa 88, nyuma y’umunota umwe asimbuye Mohammed Salah.
Gutsinda uyu mukino bihise bishyira Liverpool ku mwanya wa mbere ku rutonde rwa shampiyona n’amanota 3 n’ibitego 4 izigamye, mu gihe Chelsea na yo ifite 3 ariko ikaba izigamye ibitego 3.
