Lionel Messi yegukanye Ballon d’Or ya 2021, iba iya ya 7 atwaye

Umunya-Argentine Lionel Messi ukinira Paris Saint-Germain yo mu Bufaransa, yegukanye ku ncuro ya karindwi igihembo cya Ballon d’Or gihabwa umukinnyi wahize abandi ku Isi mu mupira w’amaguru.

Messi yegukanye iki gihembo cyatangiwe i Paris mu Bufaransa kuri uyu wa Mbere tariki ya 29 Ugushyingo, ahigitse umunya-Pologne Robert Lewandowski usanzwe akinira Bayern Munich wamuguye mu ntege.

Uyu munya-Argentine unafite Ballon d’Or ya 2019, yegukanye iy’uyu mwaka nyuma yo kwitwara neza mu mwaka w’imikino ushize yatwayemo Copa Del Rey ari kumwe na FC Barcelona yakiniraga, cyo kimwe na Copa America yatwaye ari kumwe n’ikipe y’igihugu ya Argentine.

Ni ku nshuro ya karindwi uyu mugabo w’imyaka 33 y’amavuko yegukanye Ballon d’Or kuva yatwara iya mbere muri 2009.

Uyu mukinnyi ufite iki gihembo incuro nyinshi kurusha undi mukinnyi uwo ariwe wese ku Isi, ararusha Ballon d’Or ebyiri mukeba we Cristiano Ronaldo ufite eshanu.

Uyu munya-Portugal mu matora ya Ballon d’Or y’uyu mwaka yabaye uwa gatandatu, nyuma yo kurangiza umwaka w’imikino ushize nta gikombe atwaye.

Mu bandi baje hafi ya Messi na Lewandowski harimo Umutaliyani Jorginho wa Chelsea wabaye uwa Gatatu, Mohamed Salah wa Liverpool wabaye uwa karindwi, N’golo Kanté wa Chelsea wabaye uwa gatanu, na Karim Benzema wa Real Madrid wabaye uwa kane.

Kevin de Bruyne wa Man City yabaye uwa munani, Kylian Mbappé wa PSG aba uwa cyenda na ho Gianluigi Donnarumma na we wa PSG wabaye uwa 10 anegukana igihembo cya ‘Trophée Yachine’ nk’umuzamu mwiza w’umwaka 2020/21.

Umunya-Brésil Neymar wa PSG yaje ku mwanya wa 16, na ho Luka Modric wa Real Madrid watwaye Ballon d’Or ya 2018 aza ku mwanya wa 28 ahuriyeho na Cézar Azpilicueta wa Chelsea.

Rutahizamu w’umwaka yabaye Lewandowski na ho Pedri Gonzalez yegukana igihembo cy’umukinnyi mwiza ukiri muto.

Uko abakinnyi bakurikiranye uhereye ku wa 11

11. Erling Haaland (Dortmund)

12. Romelu Lukamu (Chelsea)

13. Giorgio Chiellini (Juventus)

14. Leonardo Bonucci (Juventus)

15. Raheem Sterling (Manchester City)

16. Neymar (PSG)

17. Luis SUAREZ (Atletico)

18. Simon Kjaer (AC Milan)

19. Mason Mount (Chelsea)

20. Riyad Mahrez (Manchester City)

21. Bruno Fernandes (Manchester United)

21. Lautaro Martinez (Inter Milan)

23. Harry Kane (Tottenham Hotspur)

24. Pedri Gonzalez (FC Barcelona)

25. Phil Foden (Manchester City)

26. Ruben Dias (Manchester City)

26. (Gerard Moreno (Valencia)

26. Nicolò Barella (Inter Milan)

29. Luka Modric (Real Madrid)

29. César Azpilicueta (Chelsea).