Lionel Messi yaraye aciye akandi gahigo muri shampiyona ya Espagne
Kabuhariwe Lionel Messi ukinira ikipe ya FC Barcelona, yaraye aciye agahigo ko kuba ari we umaze kubona insinzi nyinshi muri shampiyona ya Espagne, agahigo magingo aya asangiye n’umuzamu Iker Casillas wahoze akinira Real Madrid.
Ibi Messi yabigezeho nyuma yo gutsinda ibitego 2-0 FC Barcelona yaraye itsinze Espanyol muri Derbi y’i Barcelona. Igitego cya mbere yagitsinze ku munota wa 71 kuri Coup-Franc, icya kabiri agitsinda ku wa 89 nyuma ya Contre-Attaque FC Barcelona yari iteye.
Messi kuri ubu umaze gutsinda ibitego 31 muri shampiyona y’uyu mwaka, yujuje imikino 334 amaze gutsinda muri shampiyona ya Espagne, anganya n’umuzamu Iker Casillas.
Messi kandi yakoraga akandi gahigo ko kuzuza umwaka wa cumi wikurikiranya abasha gutsinda ibitego byibura 40 mu mwaka w’imikino. Messi umaze gutsinda ibitego 31 muri shampiyona, umunani muri UEFA Champions league na bibiri muri Copa del Rey, amaze gutsinda ibitego 41.
Gutsinda Espanyol byafashije FC Barcelona gukomeza kuyobora La Liga n’amanota 69, imbere ya Atletico ya kabiri ifite amanota 59. Ni mu gihe iyi shampiyona ya Espagne ibura imikino 9 ngo isozwe.
