Levante yarangije inzozi za Barcelona zo kurangiza shampiyona idatsinzwe-amafoto
Amateka ikipe ya FC Barcelona yari igiye gukora yo kurangiza shampiyona ya Espagne idatsinzwe yaraye adobejwe n’ikipe ya Levante mu gihe haburaga umukino umwe ngo shampiyona irangire, nyuma yo kuyitsindira ku kibuga cyayo ibitego 5-4.
Ikipe ya Barcelona yari yasuye Levante kuri Estadio Ciudad de Valencia, mu mukino w’umunsi wa 37 wa shampiyona ya Espagne, La liga.
Barcelona yamaze gutwara igikombe cya shampiyona, yari ikomeje urugamba rwo kureba niba yakora amateka yo kurangiza shampiyona idatsinzwe, ikaba ikipe ya mbere ikoze aya mateka, dore ko yasabwaga gutsinda uyu mukino ubundi ikazaza irangiriza akazi kuri Real Sociedad igomba kuyisura i Camp Nou.
Ibyo Barcelona yaboneye kuri iki kibuga ni agahomamunwa, cyane umusore w’umunya Ghana witwa Emmanuel Okyere Boateng. Uyu musore w’imyaka 21 yakoreye Barcelona ibyo Christiano Ronaldo atarayikorera, ayitsinda ibitego 3 wenyine muri uyu mukino, ku munota wa 9, uwa 30 n’uwa 39, mu gihe ibindi bitego 2 byatsinzwe na Enis Bardhi ukomoka muri Macedonia, ku munota wa 46 n’uwa 56.
Ibitego bya Barcelona byatsinzwe na Philippe Coutinho watsinzemo ibitego 3 wenyine, anuzuza ibitego 6 amaze gutsinda muri iyi shampiyona kuva yatangira kuyikinamo mu kwa kabiri k’uyu mwaka, dore ko yageze muri Barcelona muri Mutarama afite imvune mu itako.
Ikindi gitego cya Barcelona cyatsinzwe na Luis Suarez, wahise yuzuza ibitego 25 amaze gutsinda muri La liga, anganya na Christiano Ronaldo.
Barcelona yari imaze imikino 43 idatsinzwe izagaruka mu kibuga kuri uyu wa gatatu ikina na Mamelodi Sundowns, mbere y’uko yakira Real Sociedad mu mukino w’umunsi wa nyuma wa La Liga uteganyijwe ku cyumweru.
