Leta ya Zimbabwe igiye gufatira imishahara y’Abakozi batarikingiza Covid-19

Mu gihe ibihugu bitandukanye hirya no hino ku Isi bikomeje gukora ibishoboka byose ngo abaturage babyo bakingirwe icyorezo cya Covid-19, Leta Zimbabwe yafashe icyemezo cyo kutazongera guhemba abakozi bayo batikingije icyorezo cya Covid-19 mbere y’igihe ntarengwa yari yarabahaye.

Kuva tariki ya 14 Nzeri 2021, abakozi ba Leta batarikingiza iki cyorezo bari bahawe ukwezi kumwe ko kuba bamaze kwikingiza; kwagombaga kurangira tariki ya 14 Ukwakira gusa kugeza nubu hari abatabikozwa.

Iki gihugu gifite intego iki cyihaye yo gukingira byibuze 60% muri uyu mwaka, ariko ikomwa mu nkokora n’imyumvire ya bamwe banze kwikingiza.

Nyuma y’aho igihe ntarengwa kigeze, Umunyamabanga wa Leta ushinzwe ubuzima, Jasper Chimedza yamenyesheje abakozi bose ko ubu uwemerewe kujya mu kazi ari ufite icyemezo kigaragaza ko yikingije.

Uyu muyobozi Chimedza ubwo yaganiragayagize n’itangazamakuru yagize ati: “Abakozi batazerekana icyemezo cy’uko bakingiwe ntabwo bazemererwa kujya mu kazi, mu rwego rwo gukurikiza ibwiriza rya Guverinoma rwo kyrwanya ikwirakwira n’ingaruka z’icyorezo cya Covid-19.”

“Abatazajya mu kazi ka buri munsi kubera ko batubahirije amabwiriza, bazafatwa nk’abagasibye kandi ibihano bizabafatirwa.”

Ibihano bizafatirwa abatajya muri aka kazi, ngo nta bindi bitari ukudahembwa umushahara.

Muri Zimbabwe hamaze gukingirwa abantu miliyoni 2.5 muri 15 z’abari muri iki gihugu.