Leta ya Canada yafatiriye indege ya Air Tanzania
Indege ya kompanyi y’ubwikorezi bwo mu kirere ya Tanzania ‘Air Tanzania’ yari iteganyijwe kugera muri iki gihugu mu mpera z’uku kwezi yafatiriwe na Canada kubera ikirego cy’ingurane y’ubutaka bw’umunya Afurika y’Epfo uvuga ko Leta ya Tanzania yabufatiriye.
Iyi ndege yo mu bwoko bwa DHC Dash 8-400 izwi nka Bombardier Q400 ifite ubushobozi bwo gutwara abantu 90 yafatiriwe na Leta ya Canada kugirango hishyurwe ingurane y’ubu butaka bw’umunya-Afurika y’Epfo Hermanus Steyn bwafatiriwe na Tanzania mu mwaka w’1980, akaba yishyuza ingurane ya miliyoni 33 z’amadolari y’Amerika.
Hermanus Steyn yatanze ikirego mu rukiko rwa Canada nyuma y’uko Leta ya Tanzania imutsindiye mu rukiko rwa Afurika y’Epfo ariko ntanyurwe nk’uko minisitiri w’ububanyi n’amahanga wa Tanzania Palamagamba Kabudi yabyemereye igitangazamakuru cya Leta gikorera mu murwa mukuru Dodoma.
Minisitiri Palamagamba yagize ati “Twatsinze uru rubanza muri Afurika y’Epfo. Sinibaza impamvu uyu muntu yagezemuri Canada! Gusa abanyamategeko bacu bariteguye.”
Yakomeje agira ati “Nabonanye na Ambasaderi wa Canada muri Tanzania mubwira ko Tanzania itishimye- mu by’ukuri turababaye!”
Ikinyamakuru Africanews kivuga ko uwunganira Hermanus wishyuza ingurane we avuga ko Tanzania yagombaga kumuha miliyoni 33 z’amadolari ariko ikaba yaramwishyuye miliyoni 20 gusa hagasigara miliyoni 16 ari nazo zaje kugenda ziyongeraho inyungu kugeza zongeye kugera kuri 33.
Iyi ndege yafatiriwe na Canada yubatswe kompanyi “Canada De Havilland Company ikaba yari yaratumijwe na sosiyete y’indege ya Tanzania mu rwego rwo kwagura ingendo zayo.
Si ubwa mbere hafatiriwe indege ya Tanzania kuko no muri Kanama uyu mwaka wa 2019 indege yayo yo mu bwoko bwa Airbus 220-300 yari yafatiriwe ku kibuga cy’indege cya Johannesburg ikaza kurekura muri Nzeri.
