Kwibuka 24: Sudani y’Epfo na Haiti bifatanyije n’Abanyarwanda kwibuka Jenoside yakorewe Abatutsi

09/04/2018 Leo Hakizimana

Mu gihugu cya Sudani y’Epfo na Haiti, Abanyarwanda bahaba ndetse n’inshuti z’ u Rwanda bahuriye hamwe maze nabo bifatanya n’Abanyarwanda kwibuka Jenoside yakorewe Abatutsi.

Mu gihugu cya Sudani y’Epfo, amagana y’inshuti z’u Rwanda n’abari mu butumwa bw’amahoro muri iki gihugu baturuka mu bihugu bitandukanye ku Isi bifatanyije n’Abanyarwanda bariyo nukuvuga Polisi, Ingabo n’abagize Ihuriro ry’Abanyarwanda bahaba kwibuka ku nshuro ya 24 Jenoside yakorewe Abatutsi mu 1994,

Muri uyu muhango warabereye mu Mujyi Mukuru w’iki gihugu wa Juba, mu Bayobozi b’iki gihugu bawitabiriye harimo Minisitiri ufite mu nshingano Itangazamakuru, Umuco na Siporo, Salah Rajab Bunduki washimye Ubuyobozi bw’u Rwanda ku iterambere burugejejeho uyu munsi nyuma ya Jenoside yakorewe Abatutsi yahitanye abarenga Miliyoni mu mezi atatu gusa.

Mu ijambo rye , Minisitiri Bunduki yagize ati : “Twigira byinshi ku buryo U Rwanda nk’Igihugu cyabayemo Jenoside rwabashije kugera ku bumwe n’ubwiyunge n’uburyo rukomeje gukataza mu iterambere.”

Umuyobozi w’Ihuriro ry’Abanyarwanda baba muri Sudani y’Epfo, Jules Uwimana yabwiye abitabiriye uwo muhango wo kwubuka ko Jenoside yakorewe Abatutsi mu 1994 yatewe na Politiki mbi y’Abayoboye U Rwanda mu gihe yakorwaga ndetse no ha mbere y’aho; aho abayoboye igihugu muri ibyo bihe bateguye bakanashishikariza abaturage gukora Jenoside bakanatanga uburyo bwo kuyishyira mu bikorwa.

Abandi Banyacyubahiro bitabiriye umuhango wo kwibuka ku nshuro ya 24 Jenoside yakorewe Abatutsi mu 1994 wabereye muri Sudani y’Epfo harimo Intumwa idasanzwe y’Umunyamabanga Mukuru w’Umuryango w’Abibumbye muri iki gihugu, David Shearer, Umuyobozi w’abari mu butumwa bw’amahoro muri iki gihugu buzwi nka United Nations Mission in South Sudan (UNMISS), Lt Gen. Frank Mushyo Kamanzi, Abakozi b’Umuryango w’Abibumbye muri iki gihugu; hanwe n’abanya- Sudani y’Epfo batuye aho iki gikorwa cyabereye.

Na none muri Sudani y’Epfo, ibikorwa nk’ibi byo kwibuka byabereye mu Ntara ya Malakal na Upper Nile aho Abanyarwanda bari mu butumwa bw’amahoro muri iki gihugu buzwi nka United Nations Mission in Darfur (UNAMID) hamwe n’abagize Ihuriro ry’Abanyarwanda bahaba bifatanyije n’abari mu gihugu ndetse n’abari ahandi ku Isi kwibuka ku nshuro ya 24 Jenoside yakorewe Abatutsi mu 1994.

Ibindi bikorwa nkibi byabereye muri Haiti

Abakozi b’Umuryango w’Abibumbye muri Haiti bayobowe n’Intumwa idasanzwe y’Umunyamabanga Mukuru w’Umuryango w’Abibumbye muri iki gihugu bifatanyije n’Abanyarwanda bari mu butumwa bwo kugarura amahoro muri Haiti buzwi mu rurimi rw’Icyongereza nka United Nation Mission for Justice Support in Haiti (MINUJUSTH) mu kwibuka Jenoside yakorewe Abatutsi mu 1994.

Share on Facebook