Kuvunika kwa Dembélé byabaye amahirwe kuri Barcelona
Kuwa 17 Nzeri 2017 nibwo inkuru y’akababaro yasakaye ivuga ko umukinnyi Barcelona yari imaze iminsi isinyishije imuguze akayabo yavunitse ndetse akaba agiye kumara igihe kinini adakina.
Ousmane Dembélé yasinye amasezerano yo gukinira iyi kipe ya Barcelona avuye muri Borussia Dortmund yo mu Budage, yaguzwe akayabo k’Amapawundi agera kuri Miliyoni 135.5.
Nyuma y’igihe gito uyu mukinnyi waje afatwa nk’umucunguzi ndetse akaba umusimbura wa Neymar yinjiye muri iyi kipe, ku cyumweru cyashize yahise agira imvune ikomeye ubwo ikipe yakinaga na Getafe igatsinda ibitego 2-1 .
Yakinnyi iminota 29 gusa ahita ava mu kibuga ndetse nyuma biza kwemezwa ko agomba kumara amezi atatu n’igice adakina, akaba yaragiye kwibagisha imvune mu gihugu cya Finland.
Aya mezi yose uyu mukinnyi agiye kumara adakina agiye kuba imbarutso yo kutishyura akayabo kagera kuri Miliyoni 10 z’amayero Barcelona yari kuzishyura ikipe ya Dortmund mu gihe uyu mukinnyi yari kuzakina imikino 50 muri iyi season.
Gusa ikindi kiri muri aya masezerano kivuga ko Barcelona izishyura izi miliyoni igihe uyu mukinnyi azaba ayifashije gutwara igikombe cy’amakipe yabaye aya mbere iwayo ku mugabane w’Iburayi [Champions League] aya makipe yombi aherereyeho. Iki cyo kikaba gishoboka.
