Kiyovu Sports itewe mpaga yari yageze ku kibuga
Ikipe ya Kiyovu iterewe mpaga ku Mumena n’ikipe ya Kirehe FC, nyuma y’ibura ry’imodoka ishinzwegutwara abarwayi kwa muganga(Imbangukiragutabara.)
Kiyovu Sports yagombaga kwakira Kirehe FC mu mukino w’umunsi wa 27 wa shampiyona y’ikiciro cya mbere Azam Rwanda Premier league wagombaga kubera ku Mumena.
Amakipe yombi yagereye ku kibuga ku gihe cyateganyijwe, gusa abasifuzi banga ko umukino utangira mu gihe hari hategerejwe ko imodoka ishinzwe gutwara abarwayi kwa muganga igezwa ku kibuga.
Abasifuzi b’umukino babanje gutegereza iminota 15 nk’uko amategeko ya Ferwafa abivuga ariko iyo minota irinda irangira ndetse hanarenga indi minota igera kuri itanu nta kirakorwa.
Nyuma yo gutekereza iyo minota, abasifuzi bamenyesheje abahagarariye amakipe yombi ko Kiyovu Sports itewe mpaga na Kirehe, bityo iyi kipe yegukana amanota 3 idakinnye.
Kiyovu Sports ibaye ikipe ya kabiri itewe shampiyona muri uyu mwaka w’imikino, nyuma ya Miroplast yo yatewe mpaga kubera kubura mu mukino wa shampiyona wagombaga kuyihuza na Rayon Sports.
