Kiyovu Sc inganyije na Rayon Sports, inanirwa gukuraho amateka amaze imyaka 6
Umukino w’umunsi wa 17 wa shampiyona y’ikiciro cya mbere Azam Rwanda Premier league wahuzaga ikipe ya Kiyovu Sports na Rayon Sports urangiye amakipe yombi anganyije ibitego 2-2, Kiyovu Sports inanirwa gukuraho amateka amaze imyaka itandatu idatsinda Rayon Sports.
Muri uyu mukino wabereye kuri Stade ya Kigali, amakipe yombi yatangiye uyu mukino asatirana, gusa kugera ku munota wa 26 nta kipe yari yakabonye uburyo bukanganye cyane imbere y’izamu ry’indi.
Kuri koruneli yatewe na Nizeyimana Djuma ku munota wa 26 w’umukino, Kiyovu Sports yafunguye amazamu ibifashijwemo na kapiteni wayo Kakule Mugheni Fabrice watsinze igitego ku makosa ya Faustin Usengimana na Mugabo Gabriel bananiwe gukiza izamu ryabo.
Iki gitego cyahaye imbaraga abasore ba Kiyovu Sports, barwana ishyaka bashaka icya kabiri, gusa iminota 45 y’igice cya mbere yarangiye nta kindi gitego kibonetse muri uyu mukino.
Rayon Sports yatangiye igice cya kabiri cy’umukino igerageza kwataka ngo irebe ko yakwishyura igitego yari yatsinzwe mu gice cya mbere cy’umukino, biza no kuyihira kuko ku munota wa 53 Binyemana Caleb yaje kwishyura iki gitego kuri Penaliti, nyuma y’ikosa Mbogo Alli yari akoreye mu rubuga rw’amahina.
Nyuma y’iminota 5 Rayon Sports yishyuye, Kiyovu Sports yahise itsinda igitego cya kabiri cyatsinzwe na Francis Mustapha ku mupira yari ahawe na Nizeyimana Djuma.
Iki gitego cyikinjira, umutoza Ivan Minnaert yahise akora impinduka, avana mu kibuga Manishimwe Djabel yinjiza Shabani Hussein Tchabalala wakinaga umukino we wa mbere muri shampiyona kuva yagera muri Rayon Sports, mu gihe Nahimana Shassir na we yinjiye asimbura Mugisha Francois.
Izi mpinduka zatumye Rayon Sports ibasha kugumana umupira, byanatumye isatira ikipe ya Kiyovu ngo irebe uko yakwishyura, n’ubwo Kiyovu yari iyobowe na Kapiteni wayo Mugheni yanyuzagamo ishaka igitego cya 3.
Ibyishimo by’abafana ba Kiyovu Sports byaje guhoshywa na Shabani Hussein Tchabalala watsindiye Rayon Sports igitego cya kabiri ku munota wa 82 w’umukino, iki gitego gihita kinagumishaho amateka y’uko Kiyovu Sports imaze imyaka 6 idatsinda mukeba wayo, dore ko vuba iyi kipe yo ku mumena iherukira gutsinda Rayon Sports hari ku wa 21 Mata 2012 ubwo umugande Bakabulindi Julius yafashaga Kiyovu gutsinda Rayon Sports 1-0.
Kunganya kwa Kiyovu na Rayon Sports guhaye APR FC umutekano wo gukomeza kuyobora iyi shampiyona n’amanota 34, AS Kigali yatsinze Miroplast 3-0 yafashe umwanya wa 2 n’amanota 32, Rayon Sports ifite ikirarane iza ku mwanya wa 3 n’amanota 31, mu gihe Kiyovu ari iya kane n’amanota 29.
