Kigali : RBC yatangaje ibisubizo byabonetse mu bipimo byafashwe abakristo muri za kiliziya n’insengero
Kuri iki Cyumweru tariki 3 Ukwakira 2021, Ikigo cy’igihugu cyita ku Buzima (RBC), cyapimye Covid-19 abantu 655 bari mu masengesho mu madini n’amatorero atandukanye yo mu Mujyi wa Kigali, abapimwe bose bakaba basanze ari bazima.
RBC ivuga ko bapimye abantu 143 muri Katedarali St Michel, bapima abantu 201 muri Zion Temple mu Gatenga, abantu 151 muri Restoration Church Kimisagara ndetse na EAR Remera hapimwe abantu 160, abo bose bakaba basanze nta n’umwe ufite ubwandu bwa Covid-19.
Icyo gikorwa cyo gupima abagiye mu masengesho, kije gikurikira icyaraye kibaye mu ijoro ryo ku wa Gatandatu tariki 2 Ukwakira 2021, cyo gupima Covid-19 abari mu tubari dutandukanye two mu Mujyi wa Kigali.
Kuri uwo munsi nanone, hatanzwe urukingo rwa COVID-19 ku bantu bari bitabiriye misa n’amateraniro; abantu 125 bahawe doze ya mbere naho 49 bahabwa iya 2.
Abapimwe bavuga ko gusenga bazi uko bahagaze, bituma batekana bikabaha n’icyerekezo cyo badateshuka ku ngamba zo gukomeza kwirinda covid 19 cyane ko n’iminsi yo gusenga yongerewe.
Uretse gupima mu masoko, mu mu tubari no mu nsengero, RBC irateganya gukomereza gupima mu buryo bwo gutomboza abakoresha imodoka mu rwego rwo kugira ngo haboneke ishusho y’uko ubwandu bwa COVID-19 buhagaze mu Gihugu.
Muri rusange ku munsi w’ejo habonetse abarwayi bashya 89 ba COVID-19 mu Gihugu hose bangana na 0.7% by’ibipimo 13,289 byafashwe mu masaha 24, bakaba bagejeje abamaze gutahurwaho ubwandu guhera muri Werurwe 2020 ku 97,870.
Abakize uwo munsi ni 209 barimo umwe wasezerewe mu bitaro, bagejeje abamaze gukira ku 93,366 mu gihe abakirimo kwitabwaho n’abaganga ari 3,221.
Kuri uwo munsi COVID-19 yahitanye abagore 2, uw’imyaka 79 w’i Nyamasheke n’uwa 65 w’i Gicumbi, bagejeje abamaze gupfa kuva iki cyorezo cyagera mu Rwanda ku 1,283.
Abakingiwe bashya ku Cyumweru ni 2,050 mu gihe abahawe doze ya kabiri ari 887. Abamaze gukingirwa byuzuye mu Gihugu hose ni 1,680,361 bakaba babarirwa muri 2,131,766 bamaze guhabwa nibura doze ya mbere y’urukingo.
