Kera kabaye Tuyisenge Jacques yatsindiye Petro Atletico igitego cya mbere (Amafoto)

Rutahizamu w’ikipe y’igihugu Amavubi Tuytisenge Jacques waguzwe n’ikipe ya Petro Atletico de Luanda yo muri Angola, yatsindiye iyi kipe igitego cya mbere kuva yayigeramo.

Tuyisenge Jacques wahoze ari rutahizamu ngenderwaho mu kipe ya Gor Mahia yo muri Kenya, yageze muri Petro Atletico muri Nyakanga uyu mwaka.

Uyu musore ntabwo yahise atangira kugira ibihe byiza muri iyi kipe nk’uko byamugendekeye muri 2016 akigera muri K’Ogalo, kuko yahise agira ikibazo cy’imvune, aho akiriye abanza kubura ibyangombwa byari gutuma akinira ikipe ye mu mikino nyafurika irimo.

Tuyisenge Jacques yafunguye konteri y’ibitego muri Petro Atletico kuri uyu wa gatandatu, ubwo ikipe ye yatsindaga ibitego 3-1 iyitwa  Cuando Cubango FC. Bakinaga umukino w’umunsi wa karindwi wa shampiyona.

Nyuma yo gutsinda iki gitego Tuyisenge yashimye Imana, mu butumwa yanyujije kuri Twitter ye.

Ati” Wakoze Nyagasani ku bw’igitego cya mbere natsinze muri shampiyona y’ikiciro cya mbere muri Angola (Girabola). N’ibindi bizaza”.

Yanashimiye umutoza we Toni Cosano ku bw’ikizere akomeje kumugirira.

Gutsinda uyu mukino byatumye Petro Atletico izamuka ku rutonde rwa shampiyona, ifata umwanya wa gatatu n’amanota 14. Irarushwa amanota abiri na Primero d’Agosto iyoboye iyi shampiyona n’amanota 15.