Kera kabaye Miss Muheto agiye guhabwa imodoka ye benshi bavugaga ko yaheze nk’amahembe y’imbwa

Nyuma y’uko benshi bari bamaze kuvuga ko imodoka nshya yagombaga guhabwa Miss Rwanda 2022, Muheto Nshuti Divine yaheze nk’amahembe y’imbwa, ubu yamaze gushyirwaho ibyangombwa byose aho kuyihabwa biri gusatira umunsi wa byo.

Iyi modoka nshya iri mu bwoko bwa Hyundai Venue 2022, yagejejwe mu Rwanda mu kwezi kwa Gicurasi 2022.

Ikigezwa mu Rwanda n’abahagaririye uruganda rwa Hyundai babanje kuyiparika aho bashyira n’izindi. Nyuma iyi modoka yaje guhabwa Inteko y’Umuco ari nayo ifite inshingano za Miss Rwanda nyuma yuko zambuwe Rwanda Inspiration Back Up ya Ishimwe Dieudonné watawe muri yombi.

Benshi ntibongeye kumenya irengero ry’iyi modoka ndetse bakomeza no kwibaza impamvu idahabwa uwayitsindiye.

Amakuru agera kuri BTN dukesha iyi nkuru avuga ko iyi modoka yaje kubonwa aho yajyanwe guparikwa ku nzu Ndangamurage yo kwa Richard Kandt.

Ku mafoto y’iyi modoka yashyizwe hanze n’umunyamakuru Gentil Gedeo, bigaragara ko yamaze gushyirwaho ibyangombwa byose nka nimero z’iyiranga (plaque) ndetse inanditseho imbere ko ari igihembo cy’uwegukanye ikamba rya Miss Rwanda.

Kugeza ubu biragoye kubona uwaguha amakuru yuzuye y’igihe iyi modoka izashyikirizwa nyirayo ariwe Muheto Nshuti Divine.

Ku rundi ruhande hari n’abavuga ko kuyitanga byatindijwe n’uko hari n’abandi bakobwa bagiye bemererwa ibihembo muri iri rushanwa ariko ntibabihabwe kandi bamaze gutanga ibirego ku Inteko y’Umuco.

Iyi modoka biteganijwe ko izahabwa Miss Muheto mu minsi ya vuba bikozwe n’Inteko y’umuco nyarwanda aho bazabanza kuyereka abanyarwanda ishyirwa muri Rond-point mu mujyi wa Kigali nk’uko byari bisanzwe bikorwa na mbere hose.