Kenya: Police irashinjwa kurasa amasasu ya nyayo mu bigaragambya, abapfa bari kwiyongera

Polisi y’igihugu iravugwaho ko yatangiye kurasa mu bigaragambya amasasu ya nyayo ku buryo bamwe batangiye kuhasiga ubuzima.

Ubucuruzi mu murwa mukuru wa Kenya -Nairobi bwafunze no gutwara abantu biracumbagira mu gihe abigaragambya bamaze kuba benshi cyane hagati mu mujyi.

Leta ivuga ko ikeneye imisoro mishya kugira ngo ibashe kwishyura ibyo ikenera no kwishyura imyenda ifitiye abayiguriza.

Urubyiruko rwiganjemo abo mu kiragano kizwi nka ‘Generation Z’ ruramagana uwo mushinga utaraba itegeko, ruvuga ko ugamije kuzahaza ubuzima bwabo.

Polisi irashinjwa kurasa amasasu nyayo ku bigaragambya kuwa kabiri, amashusho yashyizwe ku mbuga nkoranyambaga yerekana bamwe bakomeretse.

Polisi irashinjwa kandi ko mu masaha 24 mbere y’imyigaragambyo yashimuse abantu bagera kuri 12, bivugwa ko bari mu bavuga rikumvwa ku mbuga nkoranyambaga aho uru rubyiruko ruhuriza imigambi yo kwigaragambya.

Igipolisi ntacyo kiravuga kuri ibi birego gikomeje gushinjwa muri aya masaha yose.

Abantu babiri bapfiriye mu myigaragambyo nk’iyi yabaye mu cyumweru gishize.

Mu mpera z’icyumweru gishize, Perezida William Ruto yavuze ko ubutegetsi bwe bwifuza kuganira n’uru rubyiruko bukumva impungenge zabo.