KCCA yabaye ikipe ya mbere igeze ku mukino wa nyuma wa CECAFA Kagame Cup

Ikipe ya KCCA yo muri Uganda, yabaye ikipe ya mbere igeze ku mukino wa nyuma wa CECAFA Kagame Cup ya 2019, nyuma yo gutsinda Green Eagles yo muri Zambiaiyitsinze ibitego bine kuri bitatu.

Ni mu mukino wiyambajwemo iminota 30 y’inyongera, nyuma y’uko iminota isanzwe y’umukino yari yarangiye amakipe yombi anganya ibitego 2-2.

Iyi kipe y’i Kampala yafunguye amazamu hakiri kare, ku gitego cyatsinzwe na Alan Okello ku munota wa kabiri w’umukino. Abanya-Zambia bishyuye ku munota wa 37 ibifashijwemo na Amity Shamende, maze amakipe yombi ajya kuruhuka anganya igitego 1-1.

Ikipe ya Green Eagles yatsinze igitego cya kabiri nanone na Atity Shamende. Hari ku munota wa 52 w’umukino.

Byasabye ko KCCA icana umuriro ku izamu ry’Abanya-Zambia kugira ngo ibashe kwishyura iki gitego. Abasore nka Allan Okelo, Muzamiru Mutyaba n’abandi, bagiye babona uburyo bwinshi bw’ibitego ariko ntibabashe kububyaza umusaruro.

Kera kabaye ku munota wa 76 w’umukino, rutahizamu Alan Okello wigaragaje cyane muri iyi CECAFA yishyuriye KCCA igitego yari yatsinze.

Nyuma yo kurangiza iminota 90 y’umukino amakipe yombi anganya ibitego 2-2, hiyambajwe itegeko risanwe ryo kongeraho iminota 30. Ni itegeko ritigeze rikoreshwa mu mikino ya 1/4 cy’irangiza kuko ho iminota isanzwe yarangiye hahita hiyambazwa za Penaliti.

KCCA yakoze ibitangaza mu minota 30 y’inyongera, kuko yashoboye gutsindamo ibitego bibiri. Icya mbere yagitsinze ku munota wa 8 w’inyongera ibifashijwemo na Mike Mutyaba, mbere y’uko Sadat Anuka ayitsindira igitego cya kane ku munota wa 101.

Green Eagles yatsinze igitego cya gatatu lku munota wa 119 ibifashijwemo na Chola Christopher.

KCCA igomba guhurira ku mukino wa nyuma wa CECAFA n’ikipe irokoka hagati ya Azam FC yo muri Tanzania na AS Maniema Union yo muri Repubulika iharanira Demokarasi ya Congo.