Kavuyo ari mu y’abagabo nyuma yo kutishyura miliyoni 6.5 yaciwe n’urukiko
Muhire William (K8 Kavuyo), umunyarwanda uba muri Amerika uzwi cyane mu njyana ya Rap ari mu mazi abira nyuma yo kunanirwa kwishyura amande angana na miliyoni 6 500 000 z’amafaranga y’ u Rwanda yaciwe mu myaka ine ishize azira kwingana igihangano cy’undi muhanzi nta bubasha yabiherewe.
Kavuyo yaciwe aya mafaranga muri 2014 n’urukiko rwa Nyarugenge nyuma yo gufata amwe mu magambo yari agize amagambo y’indirimbo ”Igishakamba” ya Mupenzi Antoine w’i Musanze akayakoresha mu ndirimbo ye yise ”Acapella” nta burenganzira yabiherewe n’uyu muhanzi.
Iki kibazo cyari kimaze imyaka ine cyongeye kubyutswa ku munsi w’ejo ubwo minisiteri ifite umuco na Siporo mu nshingano zayo ejo yajyaga i Musanze mu rwegho rwo gukangurira abahanzi kumenya uburenganzira bwabo ku bihangano byabo.
Aha ni ho Mupenzi yabajije iyi Minisiteri iby’ubwo burenganzira bavugaga mu gihe atabuhawe kandi inkiko zari zemeje ko abuhabwa.
Mupenzi ni umuhanzi w’injyana gakondo, indirimbo ye Kavuyo yiganye, nk’uko byemejwe n’Urukiko, ni igishakamba nubwo we yayisubiyemo mu buryo bwa Rap.
Indirimbo ye Mupenzi yari yarayandikishije muri RDB nk’umutungo bwite mu by’ubwenge, ari na byo yifashishije atanga ikirego n’Urukiko rukabishingiraho.
