Kajugujugu ebyiri za Gisirikare zagonganiye mu kirere zihitana benshi

Abarenga icumi bapfuye nyuma y’aho kajugujugu ebyiri z’igisirikare cya Maleziya (Malaisie/Malaysia) kirwanira mu kirere zigonganiye mu kirere ziri mu myitozo y’akarasisi.

Imwe muri izi kajugujugu yaciye inkingi y’amababa (rotor) y’iyindi mbere y’uko zombi zitura ku butaka, nk’uko biboneka mu mashusho yasohowe n’ibinyamakuru byo muri iki gihugu.

Iyi mpanuka yabereye mu mujyi witwa Lumut, usanzwe urimo ikigo cy’igisirikare kirwanira mu mazi.

Nta bazwi ko baba barokotse.

Igisirikare cya Maleziya kirwanira mu kirere cyagize kiti: “Abari muri izi ndege bose bapfuye, ibisigazwa bikaba byajyanwe ku bitaro bya gisirikare [bya Lumut] ku mpamvu zo kumenya umwidondoro wabo”.

Kivuga kandi ko kigiye gushinga komite yo gukora iperereza ku cyateye iyi mpanuka.

Bivugwa ko imwe muzi izi kajugujugu, izwi nka HOM M503-3 yarimo abantu barindwi, yaguye mu muhanda.

Iyind izwi nka Fennec M502-6 yarimo abandi batatu, yaguye muri pisine (piscine) hafi y’aho.

Ikigo cy’igihugu gishinzwe ubutabazi no kuzimya imiriro kivuga ko cyamenyeshejwe iyi mpanuka saa tatu n’iminota 50 z’igitondo (9h50) mu masaha yo muri icyo gihugu (ni ukuvuga saa cyenda z’ijoro n’iminota 50 mu masaha ya Kigali).

Indi mpanuka y’indege iherutse guhitana benshi

Kenya:Umugaba mukuru w’ingabo hamwe n’abandi ba-Ofisiye bapfuye bitunguranye