Jose Mourinho yemeye umwaka umwe w’igifungo
Jose Mourinho utoza ikipe ya Manchester United yamaze kwemera gufungwa igihe kingana n’umwaka wose, nyuma yo guhamwa n’ibyaha byo kunyereza imisoro ya Leta ya Espagne ubwo yatozaga Real Madrid yo muri iki gihugu.
Ikinyamakuru El Mundo cy’i Madrid cyavuze ko umutoza Mourinho yemeye guhanwa nyuma yo gusanga ahamwa no kunyereza imisoro ingana na miliyoni 2 n’ibihumbi 900 z’ama Pounds hagati ya 2011 na 2012, nk’uko yabishinjwaga.
Cyakoze cyo n’ubwo Mourinho yagenewe iki gifungo, ntabwo azakimara ari mu buroko kuko itegeko nshinga rya Espagne ryemera umunyabyaha wakatiwe igifungo kiri munsi y’imyaka ibiri ari ubwa mbere yari akoze icyo cyaha aciribwa inkoni izamba.
Kugeza ubu ntacyo ubyobozi bwa Manchester United cyangwa ubw’urukiko buratangaza kuri iyi nkuru ya Mourinho.
Mu minsi ishize abayobozi ba Espagne bari barahagurukiye ikibazo cy’imisoro, nyuma yo gusanga hari abantu bafatwa nk’ibikomerezwa biganjemo abakinnyi b’umupira w’amaguru bayinyerezaga rwihishwa.
