Iri cupa ry’inzoga ryagurishijwe akayabo ka miliyoni 1,9 y’amadorali
Icupa rimwe ridasanzwe ry’inzoga ya Scotch whisky ryagurishijwe ku giciro kiruta ibindi ku isi cya miliyoni $1,9 muri cyamunara i Londres mu Bwongereza.
Iyi whisky yo mu bwoko bwa Macallan 1926 ni icupa rimaze imyaka 60 ryabitswe neza, byari biteganyijwe ko rigurwa ku giciro kiri hagati y’amadorali 450,000 na 570,000.
Abakoresheje iyi cyamunara ntabwo batangaje umwirondoro w’umuherwe waguze iyi nzoga. Iri cupa ryaciye agahigo kari karashyizweho n’icupa rimwe rya whisky ryaguzwe menshi kuko ryaguzwe miliyoni 1,5 y’amadorali mu 2018. Naryo ryagurishijwe na kompanyi ya Sotheby’s ari nayo yagurishije iri.
Iyi kompanyi ivuga ko iri cupa rya Macallan 1926 inzoga irimo ari whisky ntagatifu. Iyi nzoga ngo yakoranywe n’izindi ari amacupa 40 gusa.
Bikekwa ko iri ryonyine ari ryo ryarokotse abanywi. Muri cyamunara ya whisky zo hambere Sotheby’s yakoresheje harimo amacupa 467 yose hamwe yaguzwe akayabo ka miliyoni hafi 10 z’amadorari ya Amerika.
Jonny Fowle, umuhanga mu nzoga zikaze wa Sotheby’s avuga ko iki ari igihamya gikomeye cy’uburyo izi ari inzoga z’imihama nziza kurusha izindi bari bafite.
