Iran ishobora kugaba ibiteto simusiga kuri Israel
Leta ya Iran ikomeje gushinja Israel kuyihekura iyikoramo runono mu buryo bwo kwica ibikomerezwa bitandukanye byo mu gihugu imbere ndetse n’inshuti z’akadasohoka zayo.
Israel yagiye ishinjwa guhitana inkingi z’amwamba za Iran ndetse binanugwanugwa ko yaba ariyo iherutse kwivugana Perezida Ebrahim Raisi wapfiriye mu mpanuka ya kajugujugu tariki ya 19 Gicurasi 2024.
Umuyobozi mukuru w’umutwe wa Hamas uhanganye mu bitero bikomeye na Israel bwana Ismail Haniyeh, nawe yiciwe mu gitero yagabwemo muri Iran ubwo yari yagiye mu muhango w’irahira rya Perezida mushya w’iki gihugu, Masoud Pezeshkian.
Uyu mutwe utazuyaje, wasohoye itangazo usobanura ko Haniyeh yagabweho igitero n’ingabo za Israel aho yari acumbitse mu murwa mukuru wa Iran, Tehran, kuri uyu wa 31 Nyakanga 2024.
Umutwe w’ingabo zidasanzwe muri Iran uzwi nka IRGC, ari na wo warindaga Haniyeh mu gihe cy’uru ruzinduko, wemeje ko uyu muyobozi wa Hamas n’umurinzi we bishwe, hakaba hatangiye iperereza kugira ngo abagabye iki gitero bamenyekane.
Muri Kamena 2024, ingabo za Israel zashinjwe kwicira abantu 10 bo mu muryango wa Haniyeh mu gitero zagabye ku nkambi y’impunzi ya Shati iherereye mu ntara ya Gaza, muri Palestine.
Umuvugizi w’ikigo giharanira uburenganzira bw’abasivili muri Gaza, Mahmud Basal, yemeje aya makuru agira ati “Hishwe abantu 10 barimo mushiki wa Perezida wa Hamas witwa Zahr Haniyeh.”
Abishwe ni Abdel Salam Haniyeh, Nahed Haniyeh Abu Ghazi, Iman Haniyeh Umm Ghazi, Ismail Nahed Haniyeh, Muhammad Nahed Haniyeh, Moamen Nahed Haniyeh, Zahra Nahed Haniyeh, Amal Nahed Haniyeh, Shahad Nahed Haniyeh na Sumaya Nahed Haniyeh
Israel ntacyo iravuga kuri ibi gusa amakuru ari ku mbuga nkoranyambaga zitandukanye ,araca amarenga y’uko Iran ishobora guhindura ijoro umuriro w’itanura.
