Iradukunda Eric Radou na Mudeyi Suleiman berekeje muri Rayon Sports
Iradukunda Eric Radou wari myugariro wa AS Kigali mu gihe cy’imyaka ine ishize na Suleiman Mudeyi wakiniraga Musanze FC yo mu majyaruguru y’ u Rwanda, bageze muri Rayon Sports aho bagiye gukinira iyi kipe yambara uburu n’umweru.
Aba basore bombi berekeje muri Rayon Sports basangana akanyamuneza abafana b’iyi kipe bafite nyuma y’uko bari batangiye gutekereza ko Manishimwe Djabel azayisohokamo ariko bikarangira yongereye amasezerano.
Uyu musore w’i Rwamagana yasinyiye Rayon Sports amasezerano y’imyaka 2 mu gihe Mudeyi na we yasinye imyaka ibiri avuye muri Musanze FC.
Iradukunda Eric Radou ni umukinnyi ukina yugarira mu gihe Mudeyi we akina asatira izamu ariko aca mu mpande.
Iradukunda Eric bita Radou yakinnye mu ikipe y’abato ya FERWAFA mbere yo kwerekeza muri Police FC yavuyemo ajya muri AS Kigali yari amazemo imyaka 4.
Mudeyi Sulaiman w’imyaka 23 y’amavuko yerekeje muri Rayon Sports mu gihe yari agifite amasezerano y’umwaka umwe muri Musanze FC akaba yarakiniye amakipe atandukanye nka Gicumbi FC na Mukura VS.
Yakinnye imikino 26 muri shampiyona 2017-2018 atsinda ibitego birindwi (7) anatanga imipira itanu (5) yavuyemo ibitego anabona amakarita abiri y’umuhondo. Mudeyi Suleiman niwe mukinnyi wakinaga mu ikipe itaba mu mujyi wa Kigali wabashije kwinjiza igitego amakipe yose aba mu mujyi wa Kigali. Mudeyi kandi yaciye agahigo ko kuba ariwe mukinnyi ukiri muto wabashije kwinjiza igitego buri kipe yose yaje muri ane (4) ya mbere.
.
