Ingamba za COVID-19 zarizarorohejwe zishobora kongera gukazwa mu gihe gito

Minisitiri w’Ubuzima, Dr Daniel Ngamije yavuze ko COVID-19 igihari mu Rwanda ndetse ko muri iyi minsi imibare y’ubwandu iri kuzamuka ku buryo mu gihe cya vuba hazakazwa ingamba zo kwirinda.

Dr Ngamije yatangaje ibi mu gihe hashize iminsi hagaragara izamuka ry’imibare y’abasanganwa ubwandu bwa COVID-19 mu gihe mu mezi abiri ashize iyi ndwara ya COVID-19 yasaga nk’iri kurangira ndetse zimwe mu ngamba zitakiri itegeko.

Yavuze ko imibare yongeye kuzamuka nkuko biri kugaragazwa n’imibare ku buryo hakenewe ko hongera gukazwa ingamba.

Ati “Birumvikana nkuko musanzwe mubizi ibyemezo bifatwa n’inama ya Guverinoma ishingiye ku bimenyetso biba bigaragaza uko ubwandu buhagaze, mu minsi iri imbere hazabaho gutanga andi mabwiriza hakurikijwe uko icyorezo gihagaze n’ingamba zakongera gushyirwamo ingufu.”

Muri uku kwezi kandi iyi ndwara yongeye kugira Abaturarwanda yica mu gihe abantu bakekaga ko yacitse ndetse imibare yasohokaga mu minsi ishize yagaragazaga ko ntabo igihitana.

Muri uku kwezi kwa Nyakanga gusa, iki cyorezo kimaze kwivugana Abaturarwanda babiri barimo uwo cyahitanye ku wa Kabiri w’iki cyumweru.

Dr Ngamije yavuze ko COVID igihari kandi ko ikica
Dr Ngamije yibukije Abaturarwanda ko bakwiye gukomeza kwirinda bakarinda kwirara, ati “COVID irakica, tugomba kuyirinda twese.”

Imibare yaraye itangajwe na Minisiteri y’Ubuzima mu Rwanda, igaragaza ko iyi ndwara imaze guhitana abantu 1 462 mu gihe abasanganywe ubwandu kuri uyu wa Gatatu tariki 13 Nyakanga 2022 ari 32.

Imibare y’Ishami ry’Umuryango w’Abibumbye ryita ku Buzima, igaragaza ko kugeza ubu COVID-19 imaze guhitana abantu 6 379 604 mu gihe abo imaze kugaragara ku bantu 564 214 408 aho Leta Zunze Ubumwe za America ikiza ku isonga mu kuba yaragaragayemo umubare munini w’abagaragaweho iki cyorezo, bangana na 90 909 760.

Mu ntangiro z’uku kwezi kwa Nyakanga, OMS/WHO yaburiye abatuye Isi ko iyi ndwara ya COVID-19 igihari kandi ko ikica, isaba abantu gukomeza kwirinda.