Ingabo z’Ubufaransa zivuganye umuyobozi ukomeye w’intagondwa ziregwa ibitero byinshi

Perezida w’Ubufaransa Emmanuel Macron yatangaje ko ingabo z’igihugu ayoboye zahitanye umuyobozi w’umutwe wa kisilamu muri Sahara.

Adnan Abu Walid al-Sahrawi yashinze Leta ya kisilamu muri Sahara nini (ISGS) mu 2015.

Uyu mutwe uregwa ibitero byinshi byibasiye aka karere, harimo no kwica abakozi b’abatabazi b’Abafaransa mu 2020.

Perezida Macron yavuze ko urupfu rwa Sahrawi ari “indi ntsinzi ikomeye mu kurwanya imitwe y’iterabwoba muri Sahel”.

Sahel ni ahantu hanini hangana na kilometero kare miliyoni eshatu (kilometero kare 1,16) zambukiranya Afurika mu majyepfo y’ubutayu bwa Sahara, kuva Senegali mu burengerazuba kugera muri Somaliya mu burasirazuba.

Perezida Macron ntabwo yatangaje ahabereye cyangwa amakuru arambuye kuri iki gikorwa kuko yanyujije itangazo kuri Twitter.

Minisitiri w’ingabo w’Ubufaransa, Florence Parly, yanditse ku rubuga rwa Twitter ko Sahrawi yapfuye nyuma y’igitero cyagabwe n’ingabo z’Ubufaransa cya “Operation Barkhane”, zirwanya abarwanyi ba kisilamu muri Sahel, cyane cyane muri Mali, Niger, Tchad na Burkina Faso.

Yongeyeho ko “ari igitero simusiga kuri uyu mutwe w’iterabwoba”, kandi ko “urugamba rukomeje”.

Sahrawi, wavukiye mu burengerazuba bwa Sahara muri 1973, akaba yari umunyamuryango wa Polisario Front uharanira ubwigenge bwa Maroc.

Nyuma yaje kwinjira muri Al-Qaeda muri Islamic Maghreb (AQIM) maze aba umuyobozi wungirije wa Mujao, umutwe w’abayisilamu bo muri Mali washimuse abakozi b’abatabazi bo muri Espagne bakorera muri Alijeriya n’itsinda ry’abadipolomate ba Alijeriya muri Mali mu 2012.