Indege ya Air Tanzania yari yarafatiriwe na Canada yarekuwe
Kuri uyu wa 12 Ukuboza 2019 Perezida wa Tanzania John Pombe Magufuli yatangaje ko indege yo mu bwoko bwa Bombardier Q400 ya sosiyete y’ubwikorezi bwo mu kirere (Air Tanzania) yari yarafatiriwe na Leta ya Canada yarekuwe.
Iyi ndege yari yarafatiriwe na Canada mu kwezi gushize kubera umuturage w’umunya-Afurika y’Epfo witwa Hermanus Steyn waregaga Leta ya Tanzania yari yaranze kumuha ingurane z’ubutaka bwe yari yaramwambuye mu myaka y’1980.
Perezida Magufuli yatangaje ko iyi ndege yarekuwe ndetse ko mu gihe gito haraza kumenyekana umunsi n’isaha izagerera ku butaka bwa Tanzania nk’uko The Citizen yabitangaje.
Iyi ibaye indege ya gatatu ya Tanzania yari ifatiriwe kuko no muri Kanama uyu mwaka Leta y’Afurika y’Epfo yari yafatiriye indege yayo ya Airbus 220-300 iza kurekurwa muri Nzeri.
Ni nyuma y’uko muri 2017 sosiyete y’ubwubatsi bw’imihanda izwi nka ‘Stirling Civil Engineering Ltd. yo muri Canada yari yareze Tanzania ideni rya miliyoni 38 z’amadolari y’Amerika ku ku muhanda yari yarabubakiye bityo nabwo hagafatirwa indege yayo ya Q400.
