Imwe muri Leta zo muri Amerika yajyanye Ubushinwa mu nkiko ibushinja gukwirakwiza COVID-19
Imwe muri Leta zigize USA , Leta ya Missouri irarega guverinoma y’Ubushinwa n’ishyaka rya gikomunisiti riri ku butegetsi icyo yise uburiganya bugambiriwe bwaganishije ku cyorezo ubu cyibasiye isi cya Covid-19.
Eric Schmitt, intumwa nkuru ya leta ya Missouri ivuga ko Guverinoma y’Ubushinwa yabeshye Isi ku kaga iyi virus iteje n’uburyo yandura, icecekesha abavugaga ibyayo inakora bicye mu guhagarika ikwirakwira ryayo , avuga ko ibi iyi guverinoma igomba kubiryozwa mu mategeko.
Iki kirego kirasaba impozamarira ku guteza abantu akaga, impfu no kugusha ubukungu bidasanzwe byose byibasiye iyi leta.
Iki kirego kije mu gihe gutunga urutoki Ubushinwa ko ari bwo nyirabayazana w’iki cyorezo bikomeje gukorwa cyane cyane n’ubutegetsi bwa Washington.
Kugeza ubu ntiharatangazwa urukiko iyi leta yarezemo Ubushinwa, gusa iki gihugu cyagiye gihakana ibyo cyagiye kiregwa na bamwe mu bategetsi ba leta zunze ubumwe za Amerika.
Kuri iki kirego abanyamategeko bavuga ko ikirego cya leta ya Missouri kizahura n’inzitizi zirimo ko itegeko rya leta zunze ubumwe za Amerika riha leta z’ibindi bihugu ubudahangarwa.
Mu bihe bya mbere by’iki cyorezo, Bwana Trump yashimagije uko Ubushinwa buri guhangana n’iyi virus, ariko imaze kwibasira na US yahindukiranye Ubushinwa avuga ko aribwo nyirabayazana.
Gusa bamwe babibona nko kwegeka ku bandi amakosa y’ubutegetsi bwe mu kurwanya iki cyorezo.
