Igihugu cya Tanzania kizahagararirwa n’amakipe ane mu mikino Nyafurika y’umwaka utaha
Impuzamashyirahamwe y’umupira w’amaguru ku mugabane wa Afurika CAF, yemeje ko igihugu cya Tanzania kigomba guhagararirwa n’amakipe ane mu mikino nyafurika y’umwaka w’imikino wa 2019/2020.
Aya makipe ane harimo azaba ahagarariye Tanzania mu mikino Nyafurika ihuza amakipe yabaye aya mbere iwayo (Total CAF Champions league), n’andi abiri azahagararira iki gihugu mu mikino ihuza amakipe yatwaye ibikombe iwayo, Total CAF Confederations Cup.
Ibi bisobanuye ko ikipe ya Simba SC yatwaye igikombe cya shampiyona na Young Africans yabaye iya kabiri muri shampiyona ari zo zizahagararira Tanzania muri CAF Champions league.
Ku rundi ruhande, ikipe ya Azam FC yatwaye igikombe cy’igihugu na KMC yarangije shampiyona iri ku mwanya wa kane zizahagararira Tanzania mu mikino ya Total CAF Confederations Cup.
Tanzania yahawe amahirwe yo guhagararirwa n’amakipe ane mu mikino Nyafurika, nyuma yo gusanga shampiyona y’iki gihugu iri mu mashampiyona 12 akomeye ku mugabane wa Afurika. Ibi byatewe ahanini n’uko ikipe ya Simba SC yo muri iki gihugu yitwaye neza mu mikino nyafurika iheruka gusozwa, nyuma yo kugera muri 1/4 cy’irangiza cya CAF Champions league.
Ibindi bihugu bigomba no guhagararirwa n’amakipe ane birimo Algeria, Angola, RD Congo, Misiri, Guinea, Maroc, Nigeria, Afurika y’Epfo, Sudan, Tunisia na Zambia.
