Ibintu bikomeje gufata indi ntera  bwa mbere mu Rwanda abarenga10 bishwe na COVID-19 umunsi umwe 

Mu gihe icyorezo cya COVID-19 gikomeje kwiyongera hirya no hino ku Isi mu Rwanda umubare w’abandura n’abahitanwa niki cyorezo ukomeje kugenda uzamuka mugihe nyamara hashyizweho amabwiriza mashya yo gukumira iki cyorezo.

Minisiteri y’ubuzima yatangaje ko kuri uyu wa Gatandatu,COVID-19 yahitanye abantu 12 mu Rwanda bituma abamaze guhitanwa n’iki cyorezo bose baba 465.

Aba bahitanwe niki cyorezo barimo abagore umunani b’imyaka 87, 57, 54, 45, 23 (i Kigali), 55 (i Nyamagabe), 37 (i Kamonyi) na 36 (i Rubavu) n’abagabo bane b’imyaka 61 na 51 (i Kigali), 87 (i Nyaruguru) na 72 (i Karongi).

Uyu munsi kandi habonetse abarwayi bashya 898 barimo 424 muri Kigali bituma abamaze kwandura bose baba 41,696.

Abakirwaye bageze ku 13,625 barimo 47 barembye cyane.

Uyu munsi hakize abantu 334 ibi bituma abamaze gukira bose hamwebagera ku 27,606.

Mu Rwanda abantu 251,461 bamaze guhabwa doze ya kabiri y’urukingo rwa COVID19 (AstraZeneca) barimo 111 bayihawe uyu munsi.

Ku Isi, abamaze kwandura COVID-19 muri rusange bararenga miliyoni 183 barimo abasaga miliyoni 168 bakize ndetse na miliyoni 3.9 z’abantu bamaze kubura ubuzima kubera icyo cyorezo.

Mu gihe u Rwanda rutaragera nibura ku rugero rwa 60% bagomba gukingirwa, buri wese arasabwa kwitwararika no kubahiriza amabwiriza yo kwirinda iki cyorezo.

Mu Rwanda hafashwe ingamba nshya zigamije guhosha umuvuduko w’ubwandu bw’iki cyorezo, aho ingendo zihuza Umujyi wa Kigali n’izindi Ntara ndetse n’izihuza Uturere zabaye zihagaritswe, n’amasaha yo kuba abantu bakiri mu ngendo zitandukanye akarangirana na saa kumi n’ebyiri z’umugoroba (18:00).

Vainqueur Mahoro