Ibigwi by’ Umutoza Mukuru Rayon Sport yasinyishije izakoresha muri Shampiyona
Kuri uyu wa Mbere tariki ya 10 Nyakanga 2023 Ikipe Ikunzwe na benshi mu Rwanda izwi ku izina rya Gikundiro yatangaje umutoza mukuru uzayifasha mu mwaka w’Imikino w’2023-2024 ndetse akazanayifasha mu mikino Nyafurika ya Confedweration Cup izahuriramo n’andi makipe yo mu bihugu bitandukanye y’Afurika.
Rayon Sport ikaba yatangaje ko yasinyishije Umutoza Mukuru ukomoka muri Tunisia witwa Yamen Zelfani ‘Alfani’ ku masezerano y’umwaka umwe. Amakuru yo gusinyisha umutoza aje mu gihe kiza habura iminsi ibarirwa ku ntokinngo Rayon Sports yizihize ibirori bifungura umwaka w’imikino yerekaniramo imyenda izambara, abakinnyi n’abaterankunga izakoresha muri uwo mwaka w’imikino bizwi ku izina ry’
UMUNSI W’IGIKUNDIRO.
Amakuru dukesha ubuyobozi bw’Ikipe ya Rayon Sport avuga ko uyu mutoza bamuhisemo bagendeye ko ari umunyabigwi kandi amenyereye amakipe akomeye kuko ikipe yifuza kwitwara neza mu ruhando rw’Afurika ndetse ikanatwara Igikombe cya Shampiyona cy’umwaka w’Imikino 2023-2024. Biteganyijwe ko ari bugere mu Rwanda ku wa 16 Nyakanga 2023.
AMATEKA Y’UMUTOZA MUSHYA WA RAYON SPORT
Yamen Zelfani yavutse tariki 4 Nzeri 1979 yatangiye gutoza amakipe y’abato b’ikipe ya Stade Tunisien maze nyuma ayibereye umutoza wungirije w’ikipe nkuru. Yakomereje mu ikipe Abha muri shampiyona ya Saudi Arabia naho ari umutoza wungirije waje kuyitoza nk’umutoza mukuru kuva mu 2012 kugeza 2015. Nyuma yo kuza muri Abha yatoje Nouadhibou yo muri Mauritanie umwaka umwe w’ 2015-2016 maze ahita yerekeza muri Al-Merrikh yo muri Sudan mu 2018-2019.
Muri Sudan yahagiriye ibihe byiza kuko yafashije Al-Merrikh gutwara igikombe cya Shampiyona ‘Sudan Premier League mu 2018-19 ndetse anayiha n’igikombe cy’igihugu ‘Sudan Cup mu 2018’.
Akiva muri Sudan yerekeje ku mugabane w’Asia mu mwaka w’imikino 2019-2020 ahatoza Dhofar FC yo muri Oman batwarana igikombe cya Super Cup mu 2019 maze ahita agaruka muri Afurika.
Mu 2020 yatoje JS Kabylie yo muri Algeria maze ayifasha kurangiriza ku mwanya wa 3 muri Shampiyona ya Algeria ndetse inasohokera iki gihugu muri CAF Confederation Cup. muri iki gihugu ntiyahatinze kuko yahise agaruka mu rugo 2o21 akahatoza AS Soliman akaza kuyivamo ajya muri Al-Kawkab yo mu kiciro cya Kabiri muri Arabia Saudita mu mwaka w’2021-2022 nayo akayivamo mu 2022-2023 yerekeza muri Al-Talaba yo muri Iraq ari nayo aje avuyemo.
