Abagera kuri 300,000 bamaze gusinya dosiye zisabira Sergio Ramos guhanwa
Abantu bagera ku bihumbi 300 bamaze gusinya kuri dosiye isabira Sergio Ramos guhanwa, nyuma y’uko uyu myugariro wa Real Madrid avunnye ku bushake Mohamed Salah, mu mukino wanyuma wa UEFA Champions league Real Madrid yatsinzemo Liverpool 3-1.
Amahirwe ya Salah yo gukina umukino wa nyuma wa UEFA Champions league yarangiye ku munota wa 30 w’umukino, nyuma y’imvune yari yagize ku munota wa 25 w’umukino abenshi bashinja Ramos kugiramo uruhare nkana.
Muri uyu mukino kandi, Ramos yagaragaye akubita inkokora umuzamu wa Liverpool Loris Karius, nk’uko amakuru akomeza kugenda abivuga.
Abakunzi b’umupira w’amaguru benshi ku isi ntibumvise kimwe ku kuba Sergio Ramos yari agambiriye kuvuna Salah ku bushake, cyangwa ari impanuka isanzwe yagwiririye uyu munya Misiri.
Magingo aya abarenga 300,000 bamaze gusinya inyandiko isaba ko Sergio Ramos afatirwa ibihano n’ishyirahamwe ry’umupira w’amaguru ku isi FIFA, ndetse n’iry’umupira w’amaguru i Burayi UEFA.
Ubwo Salah yasohokaga mu kibuga, amashusho yerekanye Ramos amwenyura, abenshi bavuga ko yicinyaga icyara kubera ibyo yari amaze gukora, ibi nabyo bikaba biri mu bikomeje gutuma uyu musore yangwa urunuka n’abatari bake.
