Guinea: Inyeshyamba zirwana aho rukomeye zateye gereza zitorokesha uwahoze ari Perezida

Uwahoze ari Perezida wa Guinée, Col Moussa Dadis Camara wari ufungiwe muri Gereza yo mu murwa mukuru wa Guinée, yatorotse Gereza, abifashijwemo n’abasirikare bo mu mutwe ushinzwe kurwana aho rukomeye.

Uku gutoroka kwabaye mu masaha y’igitondo kuri uyu wa Gatandatu, aho i Conakry haramutse humvikana amasasu menshi.

Imodoka za gisirikare ndetse n’Ingabo zibarizwa mu mutwe ushinzwe kurwana aho rukomeye, zagaragaye mu mihanda ndetse urusaku rw’amasasu rwumvikanye hafi y’agace gakoreramo inzego za leta ahitwa Kaloum.

Abatangabuhamya bane babwiye Reuters ko mu gitondo cyo kuri uyu wa Gatandatu ari bwo ibintu byatangiye guhinduka.

Bavuze ko amasasu yatangiye kumvikana saa kumi za mu gitondo [Saa munani z’i Kigali] ndetse inzego z’umutekano zikaza umutekano mu mihanda y’i Conakry mu gihe igana mu gace ka Kaloum yo yari yafunzwe.

Ntabwo inzego nkuru z’igihugu ziragira icyo zitangaza ku nkomoko y’urwo rusaku rw’amasasu.

Ingoro y’Umukuru w’Igihugu hamwe n’izindi nyubako zikoreramo inzego za leta zibarizwa mu gace ka Kaloum ndetse ni naho Moussa Dadis Camara wagerageje guhirika ubutegetsi mu 2008 yari afungiye hamwe n’abandi basirikare.

Jeune Afrique yatangaje ko urwo rusaku rw’amasasu rwaturutse ku itoroka rya Dadis Camara. Uyu mugabo yatorotse aherekejwe n’abantu bitwaje intwaro ari kumwe n’abandi bafunganywe bashinjwa ubwicanyi bwabaye mu gihugu ku wa 28 Nzeri 2009.

Abandi batorotse ni Claude Pivi wari Minisitiri w’Umutekano ku ngoma ya Dadis Camara na Blaise Goumou. Moussa Thiégboro Camara we yaje gutabwa muri yombi na Polisi mu gace ka Yimbaya, abandi bo nta muntu uzi irengero ryabo.

Bivugwa ko itsinda ry’abakomando bari mu modoka enye, bayobowe n’umuhungu wa Claude Pivi wahoze mu mutwe udasanzwe wa gisirikare ari bo bafashije aba bagabo gutoroka.

Mu masaha y’igitondo ku wa 23 Ukuboza 2008, Aboubacar Somparé, wari Perezida w’Inteko Ishinga Amategeko, yagejeje ku gihugu itangazo rivuga ko Lansana Conté wari Perezida yapfuye azize uburwayi. Conté yapfuye ku wa 22 Ukuboza.

Itegeko Nshinga ryagenaga ko Perezida w’Inteko Ishinga Amategeko ari we uhita afata inshingano zo kuyobora igihugu hanyuma amatora agategurwa bitarenze iminsi 60.

Hashize amasaha atandatu Somparé atangaje ko Conté yapfuye, kuri televiziyo y’igihugu hatangajwe irindi rivuga ko igisirikare cyafashe ubutegetsi.

Col Moussa Dadis Camara yahise ayobora igihugu kuva ku wa 24 Ukuboza 2008 kugeza ku wa 15 Mutarama 2010.

Guinée ubu iyoborwa Col Mamady Doumbouya, wagiye ku butegetsi mu 2021. Ni kimwe mu bihugu umunani byo muri Afurika y’Uburengerazuba no Hagati byabayemo coup d’état mu myaka itatu ishize. Mali, Niger, Burkina Faso, Tchad na Gabon byose biyoborwa n’abasirikare bahiritse ubutegetsi.