Goma: Undi muntu wa 4 yagaragayeho Ebola
Ku mugoroba wo kuwa kane talki ya 1 Kanama 2019, mu Mujyi wa Goma, undi muntu wa kane yasuzumwe basanga afite icyorezo cya Ebola, nyuma y’abandi batatu bamaze guhitanwa nayo muri uyu Mujyi.
Bisa n’aho iki cyorezo gikomeza gukwirakwira vuba cyane mu mujyi wa Goma wegereye Rubavu ku ruhande rw’u Rwanda, ukaba utuwe n’abantu basaga miliyoni.
Umuntu watahuweho Ebola, urubuga Actualite.cd rukorera muri Congo Kinshasa ruvuga ko ari umugore w’umugabo uheruka guhitanywa n’iki cyorezo, akaba yaritabye Imana ku wa gatatu tariki 31 Nyakanga.
Akana k’agakobwa ko muri uyu muryango na ko katahuweho Ebola, gahita kitaba Imana.
Radio Okapi yo ivuga ko uwatahuweho Ebola ari umwe mu bana b’abakobwa bo muri uriya muryango wa nyakwigendera wari umucukuzi w’amabuye y’agaciro. Cyongeraho ko ari umuntu wagatatu utahuweho Ebola mu mujyi wa Goma.
Minisiteri y’Ubuzima muri Congo Kinshasa yatangaje ko umuntu urwaye Ebola yageze i Goma tariki 14 Nyakanga 2019, yari Umupasiteri uvuye i Butembo kubwiriza Ijambo ry’Imana, nyuma yaje guhitanwa n’iyi ndwara.
Kuva taliki ya 01 Kanama, 2018 Ebola imaze kwica abantu barenga 1655 muri Congo Kinshasa, yavuzwe cyane mu gace karimo imirwano ka Ituri.
