26/11/2018 Kwizera Robby

Ghana: umupfu asigaye ashyingurwa mu isanduku ishushanya imico yari afite akiri muzima (AMAFOTO)

Muri Ghana abaturage badukanye umuco wo gushyingura ba nyakwigendera mu masanduku ajyanye n’ubuzima bwabaranze bakiri mu mubiri, urugero niba wari umukire ufite imodoka zihenze ushingurwa mu isanduku ibajijwe mu ishusho y’iyo modoka.

Ikindi kandi hari abandi bantu batandukanye baba bafite imico itandukanye harimo abitonda, abatera amahane n’abakunda gukina imikino itandukanye, icyo gihe iyo uri umuntu w’intakoreka bakunze bamushyingura mu isanduku imeze nk’urusenda.

Umuhanzi akorerwa isanduku imeze nk’insakaza majwi (Microphone), aya masanduku akorwa mu buryo butandukanye kuko umurobyi nawe akorerwa imeze nk’ifi kuburyo uwariwe wese wabona umuntu ugiye gushyingurwa ahita amenya imico yari afite akiri muzima.

Abo mu miryango ya ba nyakwigendera bemeza ko abapfuye bakwiye gusezerwaho mu buryo bwiza cyane bushoboka, aho usanga imihango yo gushyingura yitabwaho cyane.

BBC yasuye amabarizo ya Kane Kwei mu murwa mukuru Accra no mu mujyi wa Kumasi mu Majyepfo y’igihugu, baganira n’abakozi bo muri ayo mabarizo babaza amasanduku agendanye n’ibyo abo mu miryango ya ba nyakwigendera bifuza.

Ayo mabarizo yitiriwe Seth Kane Kwei, bamwe bavuga ko ari we wa mbere watangije kubaza amasanduku muri ubwo buryo.

Mu gihe Ghana ari kimwe mu bihugu bya mbere ku isi bihinga cocoa, ikorwamo shokola (chocolat), imiryango ituye mu bice by’icyaro ikusanya ndetse ikizigamira amafaranga aba yavuye muri ubwo buhinzi, bashyingura ababo mu masanduku akoze mu ishusho ya cocoa.

iyi ibajije mu ishusho y’indege bigaragaza ko nyirayo yari afite inzozi zo kuyigura kabone n’ubwo atabigezeho

Ikozwe mu bwiko bw’imodoka bwa Benz igaragaza ko nyirayo yari umukire cyangwa se ko yari afite inzozi zo kugura iyo modoka

Iramvuwe mu ishusho y’urusenda igaragaza ko nyirayo yari intakoreka kimwe n’uko urusenda rudapfa gukinishwa n’ubonetse wese

iyi iramvuwe mu ishusho y’indangurura majwi (Micro) ishyingurwamo abasanzwe bakora umwuga wo kuririmba

Iramvuwe mu ishusho y’inzu ya kadasiteri igenewe abantu basanzwe bakora mu by’ubwubatsi ndetse n’abandi babaka amazu bakayakodesha abantu

Indege,iyo ari iy’umwana muto, ababyeyi be cyangwa abagize umuryango akaomoka mo babwira umubaji iyo bifuza bakurikije uko bamubonaga akiri muzima cyangwa akiri mu nda ya nyina

Amashusho atandukanye agaragaza ubwoko bwose bw’amasanduku bakorera abayakeneye

Nyuma y’amafoto atandukanye yagaragajwe hari n’andi menshi atabashije kugaragazwa uyu mugabo akora harimo ayinyamaswa, ubwato n’ibindi bikoresho bitandukanye.

Share on Facebook