Gasogi United yegukanye igikombe cya shampiyona y’ikiciro cya kabiri (Amafoto)

Ikipe ya Gasogi United yegukanye igikombe cya shampiyona y’ikiciro cya kabiri 2018/2019, nyuma yo gutsinda ku mukino wa nyuma Heroes FC kuri penaliti 4-2.

Ni nyuma y’uko iminota isanzwe y’umukino yari yarangiye aya makipe yombi yamaze kuzamuka mu kiciro cya mbere anganya igitego 1-1.

Heroes ni yo yari yabanje gufungura amazamu ibifashijwemo na rutahizamu w’ikipe y’igihugu y’abatarengeje imyaka 17, Nyarugabo Moise; Gasogi United yishyurirwa iki gitego kuri penaliti na rutahizamu igenderaho Dusenge Bertin.

Gasogi United isannzwe iba mu biganza by’umunyamakuru akaba n’umushabitsi Kakooza Nkuliza Charles (KNC), uretse kuba yegukanye iki gikombe, yanahawe akayabo ka miliyoni eshatu z’amafaranga y’u Rwanda. Ni nyuma y’umwaka umwe wonyine iyi kipe ihawe ubuzima gatozi bwo kuba umunyamuryango wa FERWAFA.

Ikipe ya Heroes yabaye iya kabiri yegukanye akayabo ka miliyoni imwe n’igice y’amafaranga y’u Rwanda, mu gihe Etoile de l’Est yegukanye akayabo k’ibihumbi 500 by’amanyarwanda nyuma yo kwegukana umwanya wa gatatu itsinze Sorwathee ibitego bitatu ku busa.