Gahunda ya APR FC ikomye mu nkokora umukino wa Rayon Sports

Umukino wa gicuti wagombaga  guhuza Rayon Sports na Etincelles mu rwego rwo kumurika imodoka nshya n’abakinnyi bashya barimo rutahizamu w’umunya-Brazil Jonathan Rafael da silva wasubitswe bitewe n’imyitozo ya APR FC.

Rayon Sports yari yateguye akarasisi aho abakinnyi, abafana n’abayobozi ba rayon Sports bari kuva kuri Stade Amahoro I Remera bakerekeza kuri stade ya Kigali I Nyamirambo ahagombaga guhita  habera umukino  wa gicuti wari guhuza Rayon Sports na Etincelles saa 15:30 kuri iki Cyumweru, ariko uyu mukino wasubitswe kuko ikibuga kizaba kiri gukoreshwa  n’ikipe ya APR FC mu myitozo.

Byari ibirori byo kumurika ku mugaragaro imodoka ya Rayon Sports yaguzwe miliyoni 100 ndetse no kwereka abafana Rayon Sports yaguze barangajwe imbere na rutahizamu w’umunya-Brazil, Jonathan Rafael da Silva watanzweho akayabo k’ibihumbi 50 by’amadorali, Umugande Brian Majwega ukina mu kibuga hagati, Michael Sarpong na Mugheni Fabrice.

Ubuyobozi bwa Rayon Sports buvuga ko iyi gahunda yimuriwe ku Cyumweru gitaha.

Iyi Gahunda Rayon Sports yari yateguye yaburijwemo n’uko ikibuga kizaba kiri gukoreshwa n’ikipe ya APR FC mu myitozo.

Ubuyobozi bwa Rayon Sports bwasabye Umujyi wa Kigali ikibuga babifashijwemo na FERWAFA ariko biranga bababwira ko  ikibuga kitazaboneka kuko APR FC izaba iri mu myitozo mu masaha bifuzaga gukinamo na Etincelles FC.

Ikipe ya APR FC ikomeje kwitegura umukino ubanza w’ijonjora rya CAF Champions league igomba guhuriramo na Club Africain,ikaba  ifite umukino wa gicuti igomba guhuriramo na Pepeniere kuri uyu wa gatandatu kuri Stade ya Kigali I Nyamirambo saa kumi.

Ni mu rwego rwo gukomeza kwitegura ikipe ya Club Africain bazahura ku wa gatatu w’icyumweru gitaha. Umukino ubanza hagati y’aya makipe yombi uzabera kuri Stade ya Kigali I Nyamirambo.

Ikipe ya Club Africain biteganyijwe ko igera I Kigali kuri iki Cyumweru, tariki 26 Ugushyingo 2018.