France: Abarenga 1000 bamaze gutabwa muri yombi kubera imyigaragambyo

Mu gihugu cy’Ubufaransa hamaze iminsi haba imyigaragambyo ikomeye yatumye Leta ihindura ibyemezo bimwe na bimwe yari yarafashe , kuri ubu abantu barenga 1000 batawe muri yombi mu myigaragambyo yakomerekeyemo 135.

Minisitiri w’Umutekano mu Bufaransa, Christophe Castaner, nkuko yabitangarije Ibiro Ntaramakuru by’Abafaransa (AFP) yavuze ko  abantu 135 aribo bamaze gukomerekera muri iyi myigaragambyo barimo n’abapolisi 17.

Iyi myigaragambyo yaturutse ku izamurwa ry’umusoro ku bikomoka kuri peterori n’imibereho ihanitse y’abaturage yateguwe n’Umuryango wiswe “Yellow-Vest Movement” Uyu muryango watangirijwe kuri internet muri Gicurasi mu 2018, watumye ku wa 17 Ugushyingo hakorwa imyigaragambyo muri iki gihugu.

Mu mpera z’icyumweru gishize, mu gihugu hose abarenga 125 000 bongeye kwirara mu mihanda, barimo abagera ku 10 000 bari i Paris.

Abigaragambya bigaragambya bambaye imyenda  y’umuhondo mu kugaragaza itegeko ryo mu 2008 ryemeje umwambaro uranga abatwara imodoka unabafasha mu bwirinzi bw’impanuka zo mu muhanda.

Abigaragambya mu mihanda baba bitwaje ibyapa biriho ubutumwa busaba Perezida Emmanuel Macron kwegura.