FIFA yahaye umugisha ibihano byo kutagura abakinnyi Chelsea yafatiwe
Impuzamashyirahamwe y’umupira w’amaguru ku isi FIFA, yateye utwatsi ubujurire ikipe ya Chelsea yari yarayigejejeho burebana n’ibihano yafatiwe byo kumara season ebyiri itagura abakinnyi.
Ibi bihano Chelsea yabifatiwe mu ntangiriro z’uyu mwaka, nyuma y’iperereza ryakozwe na FIFA bagasanga Chelsea yaragiye igura abakinnyi bari munsi y’imyaka 18 ku buryo butemewe n’amategeko. Uretse guhgarikwa kugura abakinnyi, iyi kipe y’i Londres ynciwe akayabo ka £460,000.
Mu kwezi gushize Chelsea yagejeje ubujurire bwayo mu kanama k’ubujurire mu ishyirahamwe ry’umupira ku isi, gusa ubujurire bwayo bwatewe utwatsi.
Mu itangazo FIFA yashyize ahagaragara kuri uyu wa gatatu yavuze ko ”yanze ubujurire bw’ikipe ya Chelsea”.
Ibi bisobanuye ko Chelsea igomba kumara season ebyiri idasinyisha abakinnyi mpuzamahanga bari hejuru y’imyaka 16 y’amavuko.
Chelsea yarwanaga no kureba ko ubujurire bwayo bwakwemerwa, kugira ngo ibe yasinyisha umusimbura wa Eden Hazard amahirwe menshi yerekeza muri Real Madrid kuri miliyoni 100 z’ama-Pounds.
Chelsea isigaje kujyana ubujurire rwayo mu rukiko rwa siporo mpuzamahanga (CAS), nk’inzira ya nyuma yatuma ibihano yafatiwe biteshwa agaciro cyangwa bikagabanywa.
