Etincelles yongeye kwizirika kuri Rayon Sports iyibuza amanota atatu

Umukino w’umunsi wa 24 wa shampiyona y’ikiciro cya mbere AZAM Rwanda Premier league wahuzaga Rayon Sports yari yakiriye Etincelles kuri Stade ya Kigali, urangiye amakipe yombi anganyije 1-1, Rayon Sports ikomeza gusigara inyuma ya AS Kigali ndetse na APR FC bahanganiye igikombe cya shampiyona.

Uyu mukino watangiye Etincelles isatira, gahunda ari iy’igitego cyo mu minota ya mbere y’umukino, gusa Rayon Sports agakiza izamu ryayo.

Nta buryo bukanganye bwigeze buboneka hagati y’amakipe yombi, dore ko amakipe yombi yakoreshaga uburyo bwo kugerageza imipira ya kure.

Etincelles yahushije uburyo bufatika imbere y’izamu rya Rayon Sports ku munota wa 34 w’umukino ubwo  Hemedi wa Etincelles yasigaga Rwatubyaye Abdoul wari wabanje mu kibuga uyu munsi, ateye umupira ukurwamo n’umuzamu Ndayishimiye Eric.

Igice cya mbere cyarangiye ari 0-0.

Etincelles yongeye gutangira igice cya kabiri yataka izamu rya Rayon Sports, iza no kubona penaliti ku munota wa 51 w’umukino, ku mupira wari ukaswe na Ibrahim Niyonsenga, Rwatubyaye Abdoul awugaruza intoki.

Mugenzi Cedrick wanakiniye ikipe ya Rayon Sports ni we watsinze iyi penaliti, asiga Rayon Sports mu rubaza rwo gushaka uko yakwishyura iki gitego ikanatsinda icy’insinzi.

Nyuma yo gutsinda iki gitego, ikipe ya Etincelles ntiyiraye yakomeje guhiga igitego cya kabiri, gusa ibintu biyibera bibi ku munota wa 71 w’umukino ubwo Shabani Hussein Tchabalala yishyuraga igitego ku mupira wari uturutse kuri koruneli yari itewe na Yassin Mugume.

Nyuma yo kwishyura iki gitego Rayon Sports yahize icya kabiri ku mbaraga, gusa amahirwe yo kuba yakibona ayoyoka ku munota wa 88, ubwo Yassin Mugume yategaga umupira ukagarurwa n’umutambiko w’izamu.

Kunganya 1-1 na Etincelles bishyize Rayon Sports ku mwanya wa kane ku rutonde rw’agateganyo n’amanota 37, inyuma ya Kiyovu Sports ya gatatu ifite 38.

Mu yindi mikino yabaye, Musanze yatsinze Miroplast 2-0, mu gihe Gicumbi na Mukura zanganyije 0-0.