Eric Nshimiyimana yatandukanye n’ikipe ya AS Kigali
Eric Nshimiyimana wari umutoza mukuru wa AS Kigali yamaze gutandukana na yo nyuma y’imyaka ine yari amaze atoza iyi kipe y’Umujyi wa Kigali.
Mu mwanya washize, uyu mutoza wanyuze mu makipe atandukanye ya hano mu Rwanda ndetse no mu kipe y’igihugu Amavubi, yahuriye n’abakinnyi ba AS Kigali kuri Stade ya Kigali mu rwego rwo kubasezeraho no kubamenyesha ko atazongera kubatoza.
Amakuru avuga ko Mateso Jean de Dieu wari usanzwe ari umwungiriza wa Eric araba ari we uhawe inshingano zo gutoza AS Kigali mu gihe hagishakishwa umusimbura wa Eric Nshimiyimana.
Eric Nshimiyimana yasinye amasezerano yo gutoza AS Kigali muri Nyakanga 2014, mu gihe byari byitezwe y’uko ashobora kwerekeza muri Kiyovu Sports. Uyu mugabo yinjiye muri iyi kipe y’Umujyi wa Kigali abisikanye na Cassa Mbungo Andre wari umaze kuyisohokamo yerekeza muri Police FC.
