Emery Mvuyekure watandukanye na APR FC aho ashobora kwerekeza hamenyekanye
Emery Mvuyekure Emery wari umuzamu wungirije muri APR FC, yamaze gutandukana na yo nyuma y’imyaka 2 yari amaze ayibarizwamo.
Emery wageze muri iyi kipe akubutse muri Police FC, yamaze gutandukana na APR FC nyuma yo gusoza amasezerano y’imyaka 2 yari afitanye na yo.
Amakuru y’isezererwa ry’uyu musore yemejwe na Kazungu Claver usanzwe ari umuvugizi wa APR FC, mu kiganiro yagiranye n’ikinyamakuru Eachamps ku munsi w’ejo.
Kazungu yagize ati” Ni byo umuzamu Mvuyekure Emery yamaze gutandukana neza n’ikipe ya APR FC nyuma yo gusoza amasezerano ye y’imyaka 2 yarI amaze muri APR FC. Akaba yamaze guhabwa n’ubuyobozi bwa APR FC ibaruwa imwemera kujya mu ikipe iyo ariyo yose ashaka.”
Emery kuri ubu wemerewe kwigurisha, amakuru avuga ko ashobora kwerekeza muri Rayon Sports, dore ko we yanitangarije ko yagiranye na yo ibiganiro ariko ntafate umwanzuro bitewe n’uko hari n’andi makipe yo hanze y’igihugu yarimo agirana na yo ibiganiro.
Emery Mvuyekure yageze muri APR FC mu mwaka w’imikino wa 2016/2017, gusa ntiyahagirira umugsha wo kubona umwanya wo gukina nyuma y’imvune yagize yagaruka agasanga Kimenyi Yves yarafashe umwanya we ndetse bikanarangira awugumanye burundu.
