Eden Hazard yavuze ikintu gitangaje asanga ahuriyeho na Lionel Messi

Rutahizamu mushya wa Real Madrid Eden Hazard, yasubije abamugeranya na Lionel Messi avuga ko bidakwiye ngo kuko Messi asanga ari we mukinnyi wa mbere ku isi.

Ku munsi w’ejo ni bwo Real Madrid yatangaje ku mugaragaro ko yamaze gusinyisha uyu musore amasezerano y’imyaka itanu. Eden Hazard yabaye umukinnyi wa kabiri uhenze mu mateka y’umupira w’amaguru nyuma yo gutangwaho angana na miliyoni 130 z’amapawundi. Ni amafaranga ashobora kwiyongera akagera kuri miliyoni 150 bijyanye n’uko azitwara muri iriya kipe y’ibwami.

Mu gihe hari ababona ko uyu musore ukomoka mu Bubiligi afite ubuhanga nk’ubwa Lionel Messi, ku giti cye we asanga ntaho ahuriye n’uyu kapiteni wa FC Barcelona n’ikipe y’igihugu ya Argentina. Ku bwa Hazard, ngo Messi ni we mukinnyi wa mbere ku isi nta gushidikanya.

Ni ibintu Hazard yakunze kugenda avuga kenshi.

Yongeye gushimangira ubuhanga bwa Messi mu kiganiro yagiranye n’itangazamakuru kuri uyu wa gatandatu mbere y’umukino wa gicuti mpuzamahanga ikipe y’igihugu cye cy’Ububiligi yari igiye gukinamo na Kazaky

Eden Hazard yavuze ko bidashoboka ko agereranwa na we n’ubwo hari bimwe bahuriyeho.

Ati” Ntabwo nshobora kugereranwa na Messi. Yego hari ibyo twembi duhuje harimo kuba turi bagufi kandi tukaba twihuta, gusa muri buri mukino atsinda [Messi] ibitego by’ingirakamaro. Ntabwo nshobora kugereranywa n’umuntu utagereranyika.”

Kuba Hazard yamaze kugera muri Real Madrid, bisobanuye ko n’ubwo amwemera bazajya bahura bahanganye, bijyanye n’uguhangana gukunze kurangwa hagati ya Real Madrid na FC Barcelona.