AmakuruImyidagaduro

DRC: Mu gushyingura Delcat washyizwe mu mva imeze nk’imodoka babiri barashwe

Polisi yo muri Congo yarashe abantu 2 barapfa mu muhango wo gushyingura umuhanzi Delcat Idengo washyizwe mu mva imeze nk’imodoka. Polisi niyo yishe abo bantu ubwo yari iri guhosha akavuyo no kwegezayo abantu.

Delcat Idengo yashyinguwe ku wa Kabiri tariki 25 Werurwe, 2025 i Beni muri Kivu ya Ruguru ho muri Repubulika Iharanira Demokarasi ya Congo.

Ubuyobozi buvuga ko umuhango wo gushyingura uwo muhanzi wagenze neza ariko hakaza kuboneka agatsiko k’abantu kafunze umuhanda bigateza impagarara.

Pepe Kavotha,yagize ati:”Abaturage bari baje ari benshi gushyingura Idengo…. Muri uko gushyamirana kwabayeho , niho Polisi yarashe ngo itatanye abantu , aho rero niho abantu 2 bahise bapfa. Turihanganisha imiryango yabo kandi tunamagana ibyo bikorwa”.

Umurambo wa Delcat Idengo washyinguwe mu isanduku imeze nk’imodoka gusa ukaba warabanje kwerekwa abantu ibihumbi muri Stade iri mu Mujyi wa Beni.

Delcat wari umuhanzi utavugwaho rumwe, yamamaye mu ndirimbo zirimo amagambo y’ubuhezanguni mu kunga Leta ya Kinshasa n’indirimbo yasohoye ahamagarira abantu gufata intwaro bakica abatutsi yise ngo ‘Dawa ya Mututsi”.

Yapfuye arashwe ku wa 23 Gashyantare Leta ya Kinshasa ivuga ko abaye “Inshungu yacu” ivuga ko yanengaga ibikorwa bya M23.

Umutwe wa M23 , uvuga ko Idengo yiciwe mu bikirwa bibi by’urubyiruko rwari rugifite intwaro mu Mujyi wa Goma uri mu Km200 mu majyaruguru ya Beni.

Ibi byateje impagarara muri uwo Mujyi munini mu Ntara ya kabiri nini muri Kivu ya Ruguru, bituma amashuri amwe na mwe asaba abanyeshuri gusubira mu rugo kubera gutinya ko hagira abaraswa nk’uko bitangazwa na BBC.

Mu bushyamirane bwateje akajagari , Radio Okapi ivuga ko amasasu yarashwe yafashe umugabo umwe agapfa n’umugore abandi benshi bagakomereka bakaba bajyanywe kwa muganga.

Umuyobozi muri Beni twagarutseho haraguru, yasabye Leta ko abapolisi barashe abantu bashakishwa bagafatwa bakabazwa ibyo bakoze.

Ubwo umurambo wa Delcat wagezwaga mu Mujyi wa Beni, abantu batatu barapfuye kubera impanuka zo mu muhanda zivuye mu mubyigano w’abaje muri icyo gikorwa.

Delcat yafunzwe muri 2021 ahamijwe ibyaha birimo gutuka Perezida Felix Tshisekedi mu ndirimbo ze nyuma arafungurwa yongera gufungwa muri 2024 kubera imyigaragambyo.

Umunsi umwe mbere y’uko yicwa yari yashyize hanze indirimbo yise ‘Bunduki za Kwetu’, cyangwa ‘Imbunda z’iwacu’ aho yanengaga imitwe yitwaje intwaro ya M23 na CODECO na ADF.

Twitter
WhatsApp
FbMessenger