DRC: Irahira rya Perezida mushya ryasubitswe
Abanyecongo bose bari biteze ko kuri uyu wa Kabiri taliki 22 Mutarama 2019, barakurikirana indahiro za Perezida mushya Flex Tshisekedi uherutse kwemezwa ku mugaragaro ko ariwe watorewe kuyobora Repubulika iharanira Demokarasi ya Congo.
Ibyo benshi bari biteze si ko byagenze kuko mbere y’uko umunsi w’irahira ugera, hasohotse itangazo rivuga ko uyu muhango wigijwe inyuma
Nk’uko bamwe mu begereye Tshisekedi babitangaje, ngo iki gikorwa cy’irahira rya perezida mushya ryigijwe inyuma kubera impamvu z’ibikoresho.
Andi makuru agera ku rubuga 7sur7.cd dukesha iyi nkuru, aravuga ko umuhango w’irahira rya Felix Tshisekedi ushobora kuzaba kuwa Kane, itariki 24 Mutarama 2019.
Intsinzi ntakuka ya Felix Tshisekedi mu matora y’umukuru w’igihugu yabaye kuwa 30 Ukuboza 2018 yemejwe bidasubirwaho n’urukiko rushinzwe kurinda itegeko nshinga kuri iki Cyumweru, itariki 20 Mutarama 2018.
Abacamanza b’uru rukiko bakaba barahaye agaciro ibyibanze byavuye mu matora byatangajwe na komisiyo y’igihugu y’amatora (CENI). Uyu muhungu w’umunyapolitiki wamamaye muri Congo, Etienne Tshisekedi akaba abaye perezida wa gatanu mu mateka ya Repubulika iharanira Demokarasi ya Congo.
Uyu muyobozi w’ishyaka UDPS riharanira demokarasi n’iterambere, akaba agiye gusimbura ku butegetsi Joseph Kabila wari ubumazeho imyaka 17 kuva mu 2001.
