DRC: Abarenga 2000 nibo bamaze kwandura Ebola
Minisiteri y’ubuzima muri Congo , itangaza ko abantu barenga 2000 bamaze kwandura indwara ya Ebola mu mezi 10 ashize iyi ndwara yongeye kwaduka muri iki gihugu.
Ebola mu burasirazuba bwa Congo ni iya kabiri mu mateka yibasiye abantu benshi, kugeza ubu ngo kimwe cya kabiri cyaba banduye iyi ndwara ni ukuvuga abantu 1300 bose yabahitanye.
Nubwo abarenga 1300 bamaze kwicwa na Ebola kuva yakongera kwaduka muri iki gihugu, umuryango mpuzamahanga ufasha wa Oxfam uvuga ko buri munsi abakozi bawo bahura n’abaturage na n’ubu batemera ko Ebola ibaho, nkuko BBC yabitangaje.
Ibikorwa byo kuvura no kurwanya iyi ndwara muri Congo byagiye bibangamirwa nokutagirirwa icyizere n’abaturage ndetse n’umutekano muke warangwaga muri kariya gace ka k’Uburasirazuba bwa Congo.
Kugeza ubu, imaze guhagarikwa mu ntara ebyiri, ariko kugenzura uko ikomeza gukwirakwira bikomeje kurushaho kugorana kubera umutekano mucye uri mu karere k’uburasirazuba bw’iki gihugu.
Ishami ry’umuryango w’abibumbye ryita ku buzima, OMS, ryatangaje ko ibyago byuko iyi Ebola yakwira ahandi ku isi biri hasi, ariko ko bishoboka cyane ko yakwadukira n’ibihugu bituranye na Congo.
