Dore ibigwi n’amateka by’umutoza Mukuru wa APR FC
Thierry Froger ni umutoza w’Umufaransa wavutse ku wa 21 Werurwe 1963 avukira Le Mans mu Bufaransa. Mbere yo kuba umutoza yabanje guconga ruhago mu bwugarizi mu makipe atandukanye yo mu gihugu ke arimo Lille, Grenoble na Le Mans.
Amateka ye nk’umukinnyi ntiyamenyekanye cyane ariko ay’ubutoza yo arigaragaza kuko akimara guhagarika gukina yakomereje ku mwuga wo gutoza. Atangirana n’Ikipe yakuriyemo ya Le Mans ku wa 01 Mutarama 1994 kugeza ku wa 30 Kamena 1997 ayitoza imikino 158 atsinda 54 anganya 62 atsindwa 42.
Uyu mutoza w’Umunyabigwi ku wa 1 Nyakanga 1997 yafashe Lille ayitoza umwaka urenga akina imikino 52 kugeza ku wa 15 Nzeri 1998 atsinda imikino 19 anganya 17 atsindwa 16. Yakomereje muri Chateauroux ku wa 16 Nzeri 1999 ayitoza imikino 169 kugeza ku wa 30 Kamena 2003 atsinda 68 anganya 49 atsindwa 52.
Ku wa 23 Gashyantare 2004 yakomereje akazi k’ubutoza muri Gueugnon ayitoza imikino 53 maze ayisohokamo ku ya 30 Gicurasi 2005 atsinze imikino 17 anganyije 18 atsinzwe 18. Ahavuye yagiye gutoza ikipe ya Stade Reims ku wa 1 Nyakanga 2005 kugeza ku wa 30 Kamena 2007 ayitoza imikino 128 atsinda 41 anganya 37 atsindwa 50.
Ku wa 14 Kamena 2010 yasinye amasezerano yo gutoza ikipe y’igihugu cya Togo ayotoza imikino 8 anganya 3 atsindwa 5 ahita ayisohokamo ku wa 2 Werurwe 2011 ahita yinjira muri Nimes. Yayisohotsemo ku wa 25 Gicurasi 2012 ayitoje imikino 54 atsinze 21, anganyije 19 atsinzwe 14.
Yakomereje umwuga muri Vannes ku wa 29 Ukuboza 2012 ayitoza imikino 59 ayisohokamo ku wa 5 Mutarama 2015 atsinze imikino 16 anganya 22 atsindwa 21. Ku wa 7 Mutarama 2015 yahise abona andi masezerano muri US Creteil ayitoza imikino 39 atsinda 12 anganya 10 atsindwa 17 maze ku wa 7 Ukuboza 2015 asezerera gutoza amakipe y’iwabo mu Bufaransa ajya guhahira ahandi.
Akigera muri Afurika yahitiye mu ikipe ya TP Mazembe yo muri RDC ku wa 15 Gashyantare 2017 ayitoza imikino 5 atsinda 2 anganya 2 atsindwa 1 maze ku wa21 werurwe 2017 iramusezerera. Ku wa 19 Kamena 2018 yagiye gutoza USM Alger yo muri ALGERIA ayitoza imikino 37 atsinda imikino 20 anganaya 7 atsindwa 10 ayisohokamo ku wa 14 werurwe 2019.
Mu 2020 ku wa 5 Ukuboza yagarutse muri USM Alger akina imikino 12 atsinda 6 anganya 1 atsindwa 5 ahita ayisohokamo ku wa 7 Werurwe 2021. Ku wa 31 Mutarama 2022 yasinye amasezerano yo gutoza Arta/Solar7 yo muri Djibouti ayisohokamo ku wa 15 Ugushyingo 2022 ayitoje imikino 20 atsinzemo 13 anganyije 5 atsinzwe 2.
Thierry Froger yatoje imikino 794 atsinda 289 anganya 252 atsindwa imikino 253. Kuri ubu ni we mutoza Mukuru mushya APR ije kwifashisha mu guhangana n’amakipe akomeye mu Rwanda. Arimo Rayon Sport, Kiyovu Sport, AS Kigali, Police Fc na Mukura VS& Loisir mu mwaka w’imikino 2023-2024 ndetse no mu mikino izahuza amakipe yabaye aya mbere iwayo CAF Champions League.
