Donald Trump yaburiye Irani ko ashobora kuyisenya burundu

Perezida wa Leta Zunze Ubumwe z’Amerika ,Donald Trump   yavuze ko adashaka intambara, ariko aburira Irani ko iramutse ibaye yaba ari “isenyuka rya burundu” kuri Irani.

Ubu Amerika yasabye akanama k’umutekano mu muryango w’abibumbye ko gaterana ku wa mbere w’icyumweru gitaha kakiga kuri Irani.

Mu kiganiro Trump yagiranye na televiziyo NBC yo muri Amerika ku munsi w’ejo ku wa gatanu, yavuze ko Amerika ishyize imbere ibiganiro, ariko ko itakwemerera Irani gukora intwaro kirimbuzi za nikleyeri.

Yanasobanuye birushijeho icyemezo yafashe ku munota wa nyuma cyo kwisubiraho ku bitero by’indege byo kwihorera ku ihanurwa muri iki cyumweru ry’indege nto yitwara nta mupilote (drone) y’Amerika, avuga ko yabwiwe ko abaturage bagera ku 150 ba Irani bari kubipfiramo.

Yavuze ko umugambi wo gutera Irani “wari wamaze kunoga neza, urindiriye gusa ko mwemeza”, ariko avuga ko yahise abaza abajenerali b’Amerika abantu bari gupfira muri ibyo bitero, nuko yisubiraho.

Trump yahakanye amakuru avuga ko indege z’intambara z’Amerika zari zamaze kugera mu kirere zitumbereye muri Irani.

Mu mwaka ushize wa 2018, Amerika yikuye mu masezerano yari yagiranye na Irani mu mwaka wa 2015, agamije kugabanya ibikorwa bya nikleyeri bya Irani.

Umwuka w’ubushyamirane ukomeje gututumba hagati y’ibihugu byombi, Amerika ikaba iherutse kwegeka kuri Irani ibitero ku bwato bwayo butwara ibikomoka kuri peteroli bukorera muri ako karere. Irani yatangaje ko izarenza ikigero cyemewe ku rwego mpuzamahanga muri gahunda yayo ya nikleyeri.

Irani ivuga ko iyo drone y’Amerika yahanuye yari yinjiye mu kirere cyayo mu rukerera rwo ku wa kane. Amerika ishimangira ko drone yayo yarasiwe mu kirere ubundi gihuriweho n’amahanga atandukanye, kitari icya Irani.