Donald Trump wasimbuwe ku mwanya wa perezida muri USA yajyanye mu nkiko zimwe mu mbuga nkoranyambaga zikomeye ku Isi
Uwahoze ari perezida wa Leta zunze ubumwe z’Amerika Donald Trump yatanze ikirego mu rukiko arega kompanyi rutura z’ikoranabuhanga Google, Twitter na Facebook, avuga ko zanize ubwisanzure bwe.
Iki kirego gihuriweho gishinja kandi abayobozi bakuru b’ibi bigo bitatu.
Konti za Trump kuri izi mbuga nkoranyambaga zahagaritswe mu kwezi kwa mbere kubera kurenga ku mabwiriza yazo nyuma y’imyigaragambyo y’abamushyigikiye ku nteko ishingamategeko ya Amerika.
Kuwa gatatu, Trump iki kirego yakise “amakuru meza cyane ku bwisanzure bwacu bwo kuvuga”.
Mu kiganiro yatangiyemo amakuru ari aho akinira golf i New Jersey, Trump yibasiye izo mbuga nkoranyambaga n’abo mu ishyaka ry’abademokarate, abashinja gushyigikira amakuru atari yo.
Ati: “Turasaba kurangira k’uko guhagarikwa kubi, guhagarika gucecekeshwa, no guhagarika gukanga, gufunga no kubuza muzi neza.”
Ikirego kirasaba urukiko gukuraho kuniga ubwisanzure. Trump yongeyeho ko niba bashobora guhagarika perezida, “bashobora kubikorera buri wese”.
Nta kompanyi n’imwe mu zarezwe iragira icyo ivuga kuri iki kirego, cyashyikirijwe urukiko rwa leta ya Amerika muri Florida.
Twitter ivuga ko yahagaritse Trump kubera ubutumwa yahanditse “bushimagiza ubugizi bwa nabi” buhera tariki 08 z’ukwa mbere, iminsi ibiri nyuma y’imyigaragambyo mu murwa mukuru.
Iyo myigaragambyo yakurikiye ukwidoga kwe, kudafite ibihamya, ko mu matora yibwe amajwi agahabwa mukeba we Joe Biden.
Ejo kuwa gatatu kandi, abadepite bo mu nteko bashyigikiye Trump basohoye inyandiko y’umugambi wabo wo “guhagurukira kompanyi nini”.
Intego yabo ni ugusaba ko hafatwa ingamba zo “gutandukana” n’izi kompanyi nini, no guhindura ingingo y’itegeko izwi nka Section 230.
Section 230, Trump yagerageje guhindura akiri perezida, ibuza ko kompanyi nka Facebook na Twitter kuba zaryozwa ibyo abazikoresha bashyizeho. Iha izi kompanyi umwanya w’urubuga’ aho kuba uwatangaje’.
Kuwa gatatu Trump yongeye kunenga iyi ngingo y’itegeko ati: “Ni ukurengera kuryozwa icyaha, ibyo umuntu uwo ari we wese mu mateka y’igihugu cyacu atigeze ahabwa”.
Ikirego batanze cyanenzwe n’inzobere mu mategeko, zivuga ko Trump akunda gutanga ibirego agamije kuvugwa mu binyamakuru ariko nta ngingo afite aha urukiko.
Ingingo ye y’ubwisanzure bwo gutanga ibitekerezo nayo yakemanzwe n’abasesenguzi kuko kompanyi arega zifite amabwiriza agena ibishyirwa ku mbuga zayo.
AKAMARO KIMBUGA NKORANYA MBAGA KURI DONALD TRUMP
Kuvana Donald Trump ku mbuga nkoranyambaga byahinduye ibintu ku buryo buboneka.
Nyuma yo kwamburwa indangururamajwi ye, Trump byaramugoye cyane kongera kumvwa.
Imigambi yo gufungura urubuga nkoranyambaga rwe bwite kugeza ubu ntacyo irageraho.
Ikirego yatanze kirerekana uko imbuga nkoranyambaga nini zari ingenzi kuri we.
Imwe mu nzira ze zikomeye yakoreshaga ni ukuvugisha abatora ntahandi biciye – bitanyuze mu binyamakuru bisanzwe.
Facebook yari imufitiye akamaro kihariye – yatumaga agera kuri miliyoni z’Abanyamerika akanze ahantu hamwe gusa.
Inzobere zivuga ko ikirego cye gifite amahirwe macye yo gutsinda.
Trump azaburana avuga ko uburenganzira bw’ibanze bwahonyowe. Ariko ziriya kompanyi zizavuga ko, nka kompanyi zigenga, zifite uburenganzira ku ukoresha imbuga zabo – ingingo ifite amahirwe menshi yo gutsinda.
Abarepubulikani nabo barifuza kuzana ingingo yo “gutandukana” na kompanyi nini z’ikoranabuhanga. Ariko mu gihe ubu badafite ubwiganze mu nteko cyangwa muri sena biragoye kubigeraho.
Trump arifuza cyane kugaruka mu makuru, ariko bishobora kutamukundira vuba.
Yanditswe na Didier Maladonna
